थनिंनिसें शिक्षण अस्पताल ठप्प
येँ (सन्ध्या टाइम्स)/चिकित्साशास्त्रया स्नातकोत्तर तहया प्रवेश परीक्षाय् अनियमितता जूगु धकाः आन्दोलनय् कुहां वयाच्वंपिं चिकित्सक व प्राध्यापकतय्सं त्रिवि शिक्षण अस्पताल महाराजगञ्जय् थनिंनिसें आकस्मिक व आन्तरिक बाहेकया फुक्क सेवा ठप्प याना बिउगु दु ।
अथे अस्पतालया ज्या हे ठप्प याना बिउगुलिं अस्पतालय् वःपिं द्वलंद्वःम्ह मनूत मर्काय् लाःगु दु। वंगु शनिवाः व म्हिगः न्ह्याकूगु एम एस व एमडीया प्रवेश परीक्षाय् अनियमितता जूगु खँ न्ह्यथँसें चिकित्साशास्त्र अध्ययन संस्थान त्रिवि शिक्षण अस्पताल प्राध्यापक संघ शाखा, आवासीय चिकित्सक संगठन, स्वतन्त्र विद्यार्थी युनियनं आन्दोलन याःगु खः ।
इमिसं डिनया राजीनामा माग यासें प्रवेश परीक्षा रद्द यायेमाःगु नापं अनियमितताया छानविन यायेमाःगु माग यानाः उगु कथं आन्दोलन याःगु खः। थःपिनि माग पूरा मजुल धाःसा मेमेगु ज्याझ्वः यायेमालीगु ख्याच्वः नं बिउगु दु ।
