नेवाः राजनीति यायेगु खँय् सहमत
येँ (सन्ध्या टाइम्स)/नेवाः न्ह्यलुवाः कथं न्ह्यःने वयाच्वंपिं नेतातय्सं थौंया अवस्थाय् नेवाः राजनीति यायेमाःगु खँय् सहमति प्वंकादीगु दु। नेवाः देय्गुथि नेपालमण्डल गुदँय् क्यंगु लसताय् शनिवाः जूगु नेवाः राजनीतिक सहलह मुँज्याय् न्ववानादीपिं नेवाः न्ह्यलुवातय्सं उगु सहमति प्वंकादीगु खः। नेवाः आन्दोलनया न्ह्यलुवा पद्मरत्न तुलाधर मू पाहां जुयादीगु उगु ज्याझ्वलय् नेकपा (एमाले) या केन्द्रीय दुजः राजेन्द्र श्रेष्ठं संविधानसभाया राज्य पुनर्संरचना नापं राज्य शक्ति बाँडफाँड समितिपाखें तयार याःगु नेवाः स्वायत्त प्रदेश नापं झिंप्यंगू प्रदेशया अवधारणायात सकारात्मक रुपं कयाः प्राप्त जूगु अधिकारयात रक्षा यानाः नेवाःत थप अधिकारया नितिं न्ह्याः वनेमाः धयादिल ।
नेवाः देय् गुथिया संरक्षक मल्ल के. सुन्दरं नेवाःतय्गु अधिकारया निंतिं नेवाःत जक ब्यागलं वनाः मगाः, मेमेगु आदिवासी जनजाति खलः पुचःत नाप जानाः वनेमाःगु नापं आःया अवस्थाय् राष्ट्रिय स्वाधिनतायात नं स्वाकाः नेवाः आन्दोलन न्ह्याकेमाः धकाः बः बियादिल ।
नेपाः राष्ट्रिय पार्टीया सभासद् बुद्ध साय्मिं नेवाः प्रदेशय् नेवाःत म्वाये फइगु आधारत माःगु खँ बः बियादिल।
नेवाः देय् गुथि नेपालमण्डलया नायः नरेन्द्रभक्त हाडाया सभापतित्वय् जूगु उगु ज्याझ्वलय् डा. चुन्दा बज्राचार्यं लसकुस यासें फुक्क ख्यलय् मिसापिंत समान अधिकार बिया वनेमाः धयादिल। मुँज्याय् डा. महेशमान श्रेष्ठ व शाक्य सुरेनपिंसं नं न्ववानादीगु खः ।
