मंकाः संघर्ष समितिया कार्यविधि तयार

कन्हय् तक नरेश ताम्रकार नायः, कंसंनिसें सानुराजा

येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया न्हूगु सांगठनिक संरचना कथं कन्हय् तक नरेश ताम्रकार नायः जुयादीसा कंसंनिसें लछिया निंतिं सानुराजा शाक्य नायः जुइगु जूगु दु ।

मंकाः संघर्ष समितिया न्हूगु कार्यविधि कथं झिंछम्हेसिया सचिवालय दयेकूगु दु। सचिवालय दुने मंकाः संघर्ष समितिया झिगू दुजः संस्थाया छम्ह छम्ह दुथ्याकेगु नापं निम्ह निम्ह दुजः दुथ्याकाः नीम्हेसिया निर्देशन पुचः नं दयेकूगु दु ।

निर्देशन पुचलय् दुजः संस्थाया नायः वा नायःया प्रतिनिधि नापं मेम्ह छम्ह दुथ्याकेगु नं प्रावधान तयार याःगु दु। अथे हे सचिवालय पुचःया कजि कथं मल्ल के. सुन्दरयात ल्यःगु दुसा उगु पुचलय् छम्ह दांभरी नं दइ, छ्याञ्जे धाःसा दइ मखु। सचिवालयया कजि व दांभरीया पदावधि खुला खुलाया दु ।

अथे हे न्हूगु कार्यविधि कथं मंकाः संघर्ष समितिया परिषद नं दयेकूगु दु। परिषदय् झिगू दुजः खलः पुचःया स्वम्ह स्वम्ह प्रतिनिधि तःगु दुसा स्वम्ह मध्ये छम्ह अनिवार्य रुपं मिसाम्ह जुइमाःगु प्रावधान नं तःगु दु ।

अथे हे मंकाः संघर्ष समितिइ दुजः जुइगु इच्छा दुगु छुं नं न्हूगु खलः पुचःयात आः परिषदय् दुथ्याकेगु नापं परिषदय् दछि तक दुजः जुइ धुंकाः जक उगु न्हूगु दुजः खलः पुचःयात निर्देशन समितिइ यंकेगु जुइ धकाः नं धाःगु दु ।