थनिनिसें न्यान्हु न्याचा सत्याग्रह
येँ (सन्ध्या टाइम्स)/क्वःछिनातःगु इलय् हे अग्रगामी नापं मानवअधिकार सम्मत संविधान जारी यायेमाःगु माग यासें लोकतन्त्र व शान्तिया नितिं नागरिक आन्दोलनया आह्वानय् थनिंनिसें संविधानसभाया न्ह्यःने लगातार न्यान्हु न्याचा तक न्ह्याइगु सत्याग्रह शुरु जूगु दु ।
थौं सुथय् १० बजेनिसें च्वंगु उगु धर्ना १०० घण्टा तक न्ह्याकीगु ज्याझ्वः दुसा धर्नाय् थीथी जिल्लाया नागरिक आन्दोलनया न्ह्यलुवातय्सं नं ब्वति कयादी। संविधानसभाया सभासद नापं राजनीतिक दलतय्त इलय् हे संविधान जारी यायेत नैतिक दवाव बीगु नापं जनतापाखें खबरदारी यायेगु नितिं हे थ्व धर्ना न्ह्याकागु खँ नागरिक आन्दोलनया न्ह्यलुवाः श्याम श्रेष्ठं धयादीगु दु ।
नागरिक आन्दोलनं संक्षिप्त संविधानयात विरोध यासें पूर्ण संविधान चीहाकः जूसां जारी यायेमाः धकाः माग यानाच्वंगु खँ नं वय्कलं कनादिल। संविधान वयेत निलात्या जक ल्यं दनिगु अवस्थाय् नं राजनीतिक दलया नेतात संविधान दयेकेगु ज्याय् गम्भिर जुयाः न्ह्याः मवंगुलिं थ्व धर्ना च्वंगु खः ।
