असं बजाः व्यवस्थित याइगु

येँ (सन्ध्या टाइम्स)/असन सेवा समितिं म्हिगः छगू ज्याझ्वः यासें असं बजाः व्यवस्थित यायेगु निर्णय याःगु दु। असंया अव्यवस्थित बजाः व लाक्वपाक्व पसः पिकायेगु ज्यां बजाः तच्वकं अस्तव्यस्त जुयाच्वंगु खँयात वाःचायेकाः म्हिगः याःगु छगू अन्तर्क्रिया यासें असन सेवा समितिया नायः अमूल्य तुलाधरं थनिंनिसें हे असंबजाः व्यवस्थित यायेत न्ह्यचिलेगु खँ कनादीगु खः। उगु ज्याझ्वलय् जनसेवा प्रहरी निरीक्षक, नेपाः पार्टीया न्वकु नरेशवीर शाक्य, नेवाः जागरण मञ्चया संयोजक सुजीव बज्राचार्य, ३० वडाया पूर्व वडाध्यक्ष विजयनारायण मानन्धर, २७ वडाया पूर्व वडाध्यक्ष बाबुराजा महर्जन, असन सेवा समितिया पुलांम्ह नायः यज्ञरत्न तुलाधरलिसें असंया स्थानीयबासीपिसं नुगःखँ तयादीगु खः। थौं सुथंनिसें हे त्वाःया मनूतय्सं सुथय् ८:३० तक व बहनी ४:०० बजेलिपा जक तरकारी बाहेक मेगु पसः तयेक मबीगु व लाक्वपाक्व पसःकवः नं मपिकायेत इनाप याःगु दु ।