पासपोर्ट भारतय् हे छापे याकेमाः : परराष्ट्रमन्त्री
उपप्रधानमन्त्री नापं परराष्ट्रमन्त्री सुजाता कोइरालां भारतय् हे पासपोर्ट छापे याकेत बीमाःगु खँ हान छक्वः धयादीगु दु । वय्कलं मेसिन रिडेवल पासपोर्ट (एमआरपी) छापे याकेत भारतया सरकारी कम्पनी - सेक्युरिटी प्रिन्टिङ एण्ड मिन्टिङ कर्पोरेशनयात हे बीमाःगु धयादिल ।
संयुक्त राष्ट्रसंघीय मानवअधिकार परिषद्या बैठकय् ब्वति कयाः नेपाः लिहांझायेवं त्रिभुवन अन्तराष्ट्रिय विमानस्थलय् पत्रकारत नाप खँल्हाबंला यानादिसें मन्त्री कोइरालां पासपोर्ट छापे याकेत लिबायेधुंकूगु धयादिसें आः यक्व बिचाः मयासें भारतयात हे एमआरपी छापे यायेत बीमाःगु अडान कयादिल । वय्कलं भारतयात पासपोर्ट छापे याकेत बियाः खतरा जुइसाः मेमेगू देय्या कम्पनीयात ब्यूसां नं उलि हे खतरा जुइगु धयादिल ।
अन्तराष्ट्रिय नागरिक उड्डयन संगठनया निर्देशन कथं नेपाः सरकारं वइगु अप्रिल १ दुने एमआरपी लागू यायेमाः ।
मानवअधिकार परिषद्या बैठकय् मन्त्री कोइरालां नेपाःया जारी शान्ति प्रकृया, स्थायित्व, गरिबी निवारण, मिसा सशक्तिकरण, उच्चस्तरीय राजनीतिक संयन्त्रया गतिविधि व नेपाः स्थित राष्ट्रसंघीय उच्चस्तरीय मानवअधिकार आयोगया बारे जानकारी याकादीगु खः ।
