प्रधानमन्त्री नेपाल अनमिनया भूमिका प्रति असन्तुष्ट
प्रधानमन्त्री माधवकुमार नेपालं शान्ति प्रकृयाय् नेपाः स्थित संयुक्त राष्ट्रसंघीय मिसन अनमिनं सरकारयात ग्वाहालि मयागु धासें असन्तुष्टि प्वंकादीगु दु । वय्कलं नेपाः भ्रमणय् दीम्ह राष्ट्रसंघया उपमहासचिव बी लिन पास्को नाप खँल्हाबंला यानादीसें अनमिनतया भूमिका प्रति असन्तुष्टि प्वंकादीगु खः ।
खँल्हाबंलाय् प्रधानमन्त्री नेपालं छुं न्हि न्ह्यः सरकारं माओवादी लडाकुया विवरण माग या:गु इलय् अनमिनं ग्वाहालि मयागु खँ न्ह्यथंनादिसें लडाकुया भरणपोषण व भत्ता बीत सरकारयात लडाकुतय् विवरण बीमाःगु धयादिल । उगु इलय् उपमहासचिव पास्कों लडाकुतय् विवरण उपलब्ध याकेगु खँ धयादीगु जानकारी प्रधानमन्त्रीया प्रेस सल्लाहकार राजन भट्टराईं बियादिल ।
पीन्यागू मिनेट जूगु खँल्हाबंलाय् प्रधानमन्त्रीं इलय् हे संविधान जारी यायेत व शान्ति प्रकृयायात निष्कर्षय् थ्यंकेत संविधानसभाय् दुथ्याःगु नीन्यागूलिं दल सहमत जूगु धयादिसें खुइन्हु दुने माओवादी लडाकुया व्यवस्थापन यायेगु कार्ययोजना दयेकाःगु धयादिल ।
