ख्वप व दमौलीइ दुर्घटना जुयाः झिंछम्ह सित
बुधवाः ख्वपय् व दमौलीइ निगू बिस्कं बिस्कं सवारी दुर्घटना जुयाः झिंछम्ह सिगु दुसाः झिंस्वम्ह घाःपाः जूगु दु ।
बुधवाः सनिलय् ख्वपया कौशलटारय् छगः मिनीबसं मोटरसाइकलयात ठक्कर नकेवं छम्ह सिगु दु । ख्वप-येँ चलेजुइगु बा. १. ख. २०३५ नम्बरया मिनीबसं ठक्कर बियाः ख्वपया स्वीन्यादँया केदार दथेपुथे सिगु खँ प्रहरीं धाःगु दु ।
दुर्घटना लिपाः बा. १९. प. ५९८३ नम्बरय मोटरसाइकल चालक केदारयात वासः याकेत वीर अस्पताल यंकूगु खःसा वयात वासः यायेगु झ्वलय् अन हे मदुगु खः । प्रहरीं मिनीबस चालक पीनिदँया रामजी सिन्तकलयात ज्वनाः अनुसन्धान न्हाकूगु दु । दुर्घटना लिपाः सर्वसाधारणं विरोध प्रदर्शन यायेगु नापं स्वंग बसय् मि च्याकाः ब्यूगु दु ।
उखे तनहुँया काहुशिवपुर पाखें दमौली वनाच्वंगु जीप बुधवाः न्हिनय् दुर्घटना जुयाः झिम्ह सिगु दुसाः झिंस्वम्ह घाःपाः जूगु दु । दुर्घनाय् लनाः च्याम्ह घटनास्थलय् मदुगु खःसा निम्ह दमौली अस्पतालय् वासः याकाच्वंगु इलय् मदुगु खः । इहिपाया भोजय् वनावःगु जीप काहूँशिवपुरय् कच्ची सतकं १५० मिटर क्वये कुतुंवनाः दुर्घटना जूगु खँ प्रहरीं धाःगु दु । दुर्घटना जूगु जीपया नम्बर सिकेमफुनीगु खँ प्रहरीं धाःगु दु ।
