गृहराज्य मन्त्री अन्सारी पाखें राजीनामा
गृहराज्य मन्त्री रिजवान अन्सारीं बुधवाः थःगु पदं राजीनामा बियादीगु दु । वय्कया राजीनामा बुधवाः हे प्रधानमन्त्री माधवकुमार नेपालं स्वीकृत यानादीगु दु । गृहमन्त्री भीम रावल नाप स्वापू बांमलागु व आपत्तिजनक धापू ब्यूगु धासें प्रधानमन्त्री नेपालं वय्कया राजीनामा फ्वंगु खः ।
बुधवाः न्हिनय् प्रधानमन्त्रीया ज्याकू वनाः प्रधानमन्त्रीया ज्याकू सचिव लिलामणि पौड्याल समक्ष थःगु राजीनामा पौ लःल्हानादिसें वय्कलं संचार उद्यमी जमिम शाह व अरुण सिंहानियाया हत्या व स्यनावंगु शान्ति सुरक्षाया अवस्थाया कारणया नैतिक जिम्मेवारी कासें राजीनामा बियागु प्रतिकृया बियादिल ।
गृहमन्त्री रावलया गलत कार्यशैलीया कारणं शान्ति सुरक्षाया अवस्था स्यंगु धयादिसें अन्सारीं विधिया शासन व्यवस्था व जनताया अपेक्षा कथं शान्ति सुरक्षा कायम यायेगु वातावरण मदुगुलिं राजीनामा बियागु धयादिल ।
संविधानसभाया निर्वाचनय् सर्लाही-२ पाखें त्यानादीम्ह अन्सारी वर्तमान मन्त्रीपरिषदय् एमाले पाखें प्रत्यक्ष निर्वाचित जुम्ह वय्क छम्ह जक दीगु खः ।
