नेपाः थ्यनेवं पास्को राजनीतिक खँल्हाबंलाय् व्यस्थ
संयुक्त राष्ट्र संघया राजनीतिक मामिला सम्बन्धी उपमहासचिव बी लिन पास्को नेपाः थ्यनेवं राजनीतिक खँल्हाबंलाय् व्यस्थ जुयादीगु दु । स्वंन्हुन्यंकया नेपाः भ्रमणया निंतिं बुधवाः येँ थ्यंकादीम्ह पास्कों नेपाली कांग्रेसया सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' नाप खँल्हाबंला यानादीगु दु ।
वय्कलं बुधवाः माओवादी अध्यक्ष प्रचण्ड नापलना माओवादी लडाकुतय् ल्याःया बारे च्यूताः प्वंकादीगु खः । नापं वय्कलं माओवादीयात सरकारं शान्ति प्रकृयायय् प्रतिबद्ध मदु धकाः बियाच्वंगु द्वपंया बारे नं च्यूताः प्वंकादीगु खः । प्रचण्ड निवासय् घौछि जूगु खँल्हबंलाय् प्रचण्डं माओवादी शान्ति प्रकृयाय् प्रतिवद्ध दुगु धयादिसें प्रधानमन्त्री निसें सरकारय् दुथ्याःपिं मन्त्रीतय्सं शान्ति प्रकृया स्यंकेगु षड्यन्त्र यानाच्वंगु धयादिल ।
माओवादी अध्यक्ष नापलाये न्ह्यः पास्कों कांग्रेस सभापति गिरिजाप्रसाद कोइरालायात नापानादीगु खः । बिरामी कोइरालाया छेँय् वनाः पास्कों वय्कया स्वास्थ्य अवस्थाया बारे च्यूताः प्वंकेगु नापं नेपाःया शान्ति प्रकृयाया बारे सहलह यानादीगु खः ।
मुक्कं न्हय्गू मिनेट जक जूगु खँल्हाबंलाय् कोइरालां थः शान्ति प्रकृया निष्कर्षय् थ्यंगु स्वये चाहे जूगु व संविधान निर्माण इलय् हे यायेगु पक्षय् दुगु खँ धयादीगु जानकारी कांग्रेस नेता कृष्ण सिटौलां बियादिल ।
अथेहे कोइराला नापया खँल्हाबंला लिपा पास्कों कांग्रेसाया निगूगु पुस्ताया नेतात नाप खँल्हाबंला यानादीगु खः । नेता शेरबहादुर देउवा, डा. रामशरण महत, कृष्ण सिटौला, शेखर कोइराला लगायत नेतातय्सं माओवादीं शान्ति सम्झौताया पालना मयाःगु व शान्ति प्रकृयायात तार्किक निष्कर्षय् थ्यंकेत माओवादी इमान्दार जुइमाःगु खँ धाःगु खः ।
