इलय् हे संविधान जारी जुइगु प्रमया विश्वास
संविधानसभां क्वःछिनातःगु इलय् हे न्हूगु संविधान जारी जुइगु विश्वास प्रधानमन्त्री माधवकुमार नेपालं प्वंकादीगु दु । न्हापा लिपाः सिवें सकारात्मक खनेदुम्ह प्रधानमन्त्री नेपालं इलय् हे संविधान जारी यायेत राजनीतिक दलत दथुइ गम्भीर सहलह व अर्न्तक्रिया जुयाच्वंगु धयादिल । वय्कलं माओवादी नं इलय् संविधान जारी यायेत सकारात्मक जूगु धयादिसें राजनीतिक दलत दथुइ सहमति कायम यानाः इलय् हे संविधान जारी यायेगु धयादिल ।
प्रेस चौतारी उदयपुरं बुधवाः उदयपुरया बेलटारय् याःगु पत्रकार सम्मेलनय् न्ववानादिसें प्रधानमन्त्री नेपालं अयोग्य माओवादी लडाकुतय्त शिविरं पिने छ्वःगु सरकारया तःधंगु उपलब्धी जूगु धयादिल । वय्कलं संसारय् छुं नं सरकारं शिविर दुनेया लडाकुयात बहिर्गमन यायेमफुगु तर नेपाःया वर्तमान सरकार अथे यानाः क्यंगु धइगु सरकारया तःधंगु उपलब्धी जूगु धयादिल ।
वय्कलं माओवादी लडाकुया समायोजन बिना न्हूगु संविधान जारी जुइमफइगु धयादिसें न्हापाः क्यान्टोनमेन्ट खाली यानाः जक संविधान जारी जुइगु धयादिल । नापं वय्कलं लडाकु समायोजन बिना स्थायी शान्ति कायम जुइमफइगु दाबी यानदिल ।
पत्रकार सम्मेलन लिपाः प्रम नेपालं बेल्टार बजाःया मू चूकय् दयेकूगु नेपाः कम्युनिष्ट पार्टीया संस्थापक पुष्पलाल श्रेष्ठया झ्वाताः उल्लेज्या यानादीगु खः । उखे माओवादी कार्यकर्तातय्सं वय्कयात हाकूगु ध्वाँय् क्यनेगु नापं वय्कया राजीनामा माग यासें बजाः चाहीउगु खः ।
