थौं नं मन्त्रिपरिषदं गभर्नर नियुक्त यायेमफुत
सुरक्षा व्यवस्था क्वातुकेत प्रमया निर्देशन
प्रमुख सत्तारुढ दलत नेकपा (एमाले) व नेपाली कांग्रेस दथुइ न्हूम्ह गभर्नरया नांमय् सहमति जुइमफेवं बुधवाः सुथय् च्वंगु मन्त्रिपरिदया बैठकं नं राष्ट्र बैंकया गभर्नर नियुक्ति यायेत असफल जूगु दु ।
मन्त्रिपरिषदया बैठकया एजेण्डाय् गभर्नर नियुक्त यायेगु खँ दुथ्याकूगु खःसां निगू पार्टी दथुइ सहमति मजुइवं थुकीया बारे बैठकय् सहलह हे मजूगु खँ धाःगु दु । एमालें गभर्नर पदय् राष्ट्रिय योजना आयोगया पुलांम्ह उपाध्यक्ष युवराज खतिवडायात नियुक्त यायेमाःगु अडान कयाच्वंगु दुसाः कांग्रेस धाःसाः वीरविक्रम रायमाझीयात नियुक्त यायेमाःगु अडान कयाच्वंगु दु ।
अथेहे मन्त्रिपरिषदया बैठकय् प्रधानमन्त्री माधवकुमार नेपालं देय्या शान्ति सुरक्षाया अवस्था क्वातुकेत गृहमन्त्री भीम रावलयात निर्देशन बियादीगु दु । प्रधानमन्त्री नेपालं छुं दिंया दुने हे सुरक्षा व्यवस्था सुदृढ जूगु महशुश जुइ कथं व्यवस्था यायेत निर्देशन बियादीगु खः । प्रधानमन्त्रीं गृहमन्त्रालयया असक्षमताया कारणं सरकारयात हे न्ह्यसः थनेगु ज्या जुयाच्वंगुलिं थुकी गम्भीर जुइत गृहमन्त्रीयात इनाप यानादीगु खः ।
बैठकं वरिष्ठ पत्रकार अक्षय कोष स्थापना यायेगु निर्णय याःगु दु । नापं बैठकं द्वन्द्व पीडित पत्रकार राहतया निंतिं दयेकूगु निर्देशिका नं पारित याःगु दु । अथेहे बैठकं श्रेणीवीहिन कर्मचारीया सुविधा अप्वयेकीगु निर्णय याःगु दु ।
नापं बैठकं उपराष्ट्रपति परमानन्द झां शुक्रवा निसें यानादीगु भारत भ्रमण व्यक्तिगत जूगुलिं उकीया खर्च व्योहरे मयायेगु निर्णय याःगु दु । तर बैठकं उपरराष्ट्रपति झा नापं वनीपिं सुरक्षाकर्मीतय् खर्च धाःसाः व्योहरे यायेगु निर्णय नं याःगु दु ।
