कांग्रेसया बैठक स्थगित
सभापति कोइरालाया स्वास्थ्य अवस्थाय् सुधार
नेपाली कांग्रेसया सभापति गिरिजाप्रसाद कोइरालाया स्वास्थ्य अवस्था स्यनेवं बुधवाः च्वनीगु धाःगु पार्टीया केन्द्रीय समितिया बैठक स्थगित जूगु दु । पार्टी महाधिवेशनया न्हूगु मिति क्वःछित च्वनेत्यंगु बैठक स्थगित जूगु खः । कांग्रेसं फागुन २७ गते निसें चैत १ गते तक येँय् पार्टीया महाधिवेशन यायेगु धकाः क्वःछिनातःगु खसां लिपाः उकीयात स्थगित याःसां न्हूगु मिति धाःसाः क्वःछि मफुनी । न्हापा हे क्वःछिनातःगु मितिइ महाधिवेशन याःगु खःसा थनिनिसें कांग्रेसया महाधिवेशन न्ह्यायेमाःगु खः ।
उखे स्वँया समस्यां ग्रस्त सभापति कोइरालाया स्वास्थ्य अवस्था छुं दिं न्ह्यः निसें स्यनेवं वय्कयात निरन्तर अक्सिजन बीमाःगु दु । तर आः वय्कया स्वास्थ्य अवस्था सुधार जूगु व पिने वःगु बुखँ थें अवस्था चिन्ताजनक मजूगु खँ धाःगु दु । बुधवाः कोइरालायात नाप लायेत संयुक्त राष्ट्र संघया राजनीतिक मामिला सम्बन्धी उप महासचिव बी लिन पास्को कोइराला निवास थ्यंगु इलय् छुंछुं पत्रकारतय्सं कोइरालायात नापलाःगु खः ।
मंगलवाः कोइरालाया स्वास्थ्य परिक्षण याःपिं डाक्टरतय्सं कोइरालायात थप वासः याकेत देशं पिने यंकेत सुझाव ब्यूगु खसां तत्काल वय्कयात पिने मयंकीगु जूगु दु ।
