ट्रकं मोटरसाइकलयात ठक्करं नकेवं छम्ह सित

नवलपरासीया मुकुन्दपुर-५ भेडाबारीलय् मंगलवाः बहनी ट्रकया ठक्करं मोटरसाइकलय् सवार छम्ह घटनास्थलय् हे सिगु दु । भैरहवां हेटौडा पाखे वनाच्वंगु ना. ४. ख. १२४९ नम्बरया ट्रकं मोटरसाइकलयात ठक्कर नकेवं मोटरसाइकलय् सवार नवलपरासीया टोबराम गिरी सिगु खः । नारायणगढं कावासोतीलय् वनाच्वंगु ना. ५. प. ५५७३ नम्बरया मोटरसाइकलयात ट्रकं ल्यूनें ठक्कर ब्यूगु जानकारी जिल्ला प्रहरी ज्याकू नवलपरासीं ब्यूगु दु ।

अथेहे उगु दुर्घटनाय् लानाः मोटरसाइकल चालक जनकप्रसाद न्युरे घाःपाः जूगु दु । आरापुरी छेँ जुम्ह स्वीस्वदँया न्युरेया चितवनया मेडिकल केलज भरतपुरय् वासः जुयाच्वंगु दु ।