इलय् हे संविधान जारी यायेत नागरिक खबरदारी सभा
इलय् हे संविधान जारी यायेत लोकतन्त्र व शान्तिया निंतिं नागरिक आन्दोलनं मंगलवाः नागरिक खबरदारी सभा याःगु दु । न्हू बानेश्वरय् च्वंगु संविधानसभा भवन न्ह्यने जूगु सभाय् न्ववापिं नागरिक अगुवातय्सं राजनीतिक दलतय्त संविधान निर्माण यायेगु ज्याय् गम्भीर जुइत इनाप याःगु दु ।
सभाय् न्ववनादिसें नागरिक अगुवा डा. देवेन्द्रराज पाण्डें राजनीतिक दलतय्त पार्टीगत स्वार्थ व कुर्सीया कासाय् लगेमजुसें संविधान निर्माणय् लगेजुइत इनाप यानादिल । मेम्ह अगुवा श्याम श्रेष्ठं संविधान जारी यायेत अझ नं च्यय्न्हू ल्यं दनीगु धयादिसें दलत गम्भीर जुसाः संविधान निर्माण यायेत थ्व ई प्रसष्ट जूगु धयादिल ।
अथेहे नागरिक अगुवा कृष्ण पहाडीं दलत जनयुद्धय् लितछ्वयेगु व लिहांवनीगु ज्याय् लगेजुयाच्वंगु धयादिल । सभायात डा. रेणु राजभण्डारी, डा. सुन्दरमणी दिक्षित, खगेन्द्र संग्रौला लगायत सहित्यकार, कलाकार नापं थीथी ख्यया व्यत्तित्वतय्सं न्ववाःगु खः ।
नागरिक आन्दोलनं शान्ति प्रकृयायात निष्कर्षय् थ्यंकेत, इलय् हे जनादेश अनुरुपया अग्रगमी नापं मानव अधिकार सम्मत संविधान जारी यायेत, संघीय लोकतान्त्रिक गणतन्त्रया संस्थागत यायेत निरन्तर नागरिक धर्ना व सभा यानावयाच्वंगु दु ।
