संविधान निर्माण कार्यतालिकाय् झिक्वःगु संशोधन
संविधानसभां न्हूगु संविधान जारी याइगु इलय् छुं ह्यूपा महसें संविधान निर्माणया कार्यतालिकाय् झिक्वःगु संशोधन याःगु दु । संशोधित कार्यतालिकाय् संवैधानिक समितिया न्हापांगु एकीकृत मस्यौदा तयार यायेत लछिया ई थप याःगु दु । अथेहे मेमेगू प्रकृया धाःसाः ल्यं दनीगु न्यय्न्हू दुने क्वचायेकेगु कथं कार्यतालिका संशोधन याःगु दु ।
संविधान निर्माणया निंतिं च्यय्न्हू जक ल्यं दनीगु इलय् नं महत्वपूर्ण ज्या अझ ल्यं दुगुलिं जेठ १४ गते हे संविधान जारी यायेगु कथं मेमेगू प्रकृयाया मितिइ ह्यूपा हःगु खः । संविधानसभाया मंगलवाः च्वंगु बैठकं झिक्वःगु संशोधनयात सर्वसम्मतं पारित याःगु खः ।
संविधानसभां विषयगत समितिया प्रतिवेदनय् दुगु विवादयात समाधान यानाः मस्यौदा तयार यायेमफेवं कार्यतालिकाय् झिक्वःगु संशोधन यायेमाःगु खः । गुक्वःगु संशोधित कार्यतालिका कथं फागुन २१ गते दुने संवैधानिक समितियात न्हापांगु एकीकृत मस्यौदा तयार यायेगु ई क्वःछिनातःगु खः ।
