देय् छगुलिं हे जाःगु पर्यटक वर्ष
नेपाःया छगू प्रमुख आय आर्जनया माध्यम जुयाच्वंगु पर्यटन व्यवसाययात च्वन्ह्याकेगु ताः तयाः सन् २०११ निसें शुरु जुइत्यंगु पर्यटन वर्ष ताःलाकेत देय्या फुक्कं राजनीतिक पार्टीतय्सं उगु दछि तक छुं नं कथंया बन्द व हडताल थेंज्याःगु ज्या याये मखु धकाः बचं बिउगु दु। राजनीतिक पार्टीतय्सं बन्द हडताल याये मखु धकाः बिउगु थ्व बचंपाखें पर्यटन व्यवसायीत उत्साहित जुइगु ला स्वाभाविक हे जुल लिसें मेमेगु व्यवसाय याइपिं उद्योगी व्यवसायीत नं राजनीतिक पार्टीतय् थज्याःगु मंकाः प्रतिवद्धतां लय्ताःगु खनेदु ।
सन् २०११ यात पर्यटन वर्ष घोषणा यानाः उगु दँय् नेपालय् झिगू लाख पर्यटक दुकायेगु ग्वसाः तयातःगु दु। थौंकन्हय् न्यागू लाख पर्यटक वयाच्वंगुली उकियात निदुगं यायेगु थुकिया उद्देश्य खः। यदि नेपालय् बन्द हडताल थेंज्याःगु ज्याझ्वः निरन्तर जुयाः गबलें विमान बन्द, गबलें होटल बन्द आदि जुयाच्वन धाःसा छक्वः वःम्ह पर्यटक हानं मवइगु जक मखु वं थःगु देशय् वनाः नेपालय् सुं नं वने मते धकाः मेगु प्रचार नं याना बी। यदि उगु दँय् फुक्क थासं माःगु ग्वाहालि वयाः ताः तः कथं पर्यटक साले फत धाःसा वयां लिपाया दँय् नं उलि हे मात्राय् पर्यटक वयेगु शुरु जुइ। उकिं मुख्य खँ थुगु दँया लक्ष्ययात सफल यायेमाःगु दु ।
वास्तवय् नेपाःया उद्योगी व्यवसायीत छुं याये धकाः स्वयमय् अति उत्साहित दु। उमित चिन्ता थःगु हे देयया राजनीतिक पार्टीत जुयाच्वन। पार्टीतपाखें उपिं गुलि प्रताडित जुयाच्वन धइगु खँ नं थुगुसी खने दत। उद्योगीत थें मुलुकया लागिं पार्टीत नं जिम्मेवार जुइमाःगु आवश्यक खने दत ।
