होलीया लसताय् गजल
रंगया नखःया रुपय् हनीगु होली थौंकन्हय् थुकी मचायेक बिकृति दुतिनाच्वंगु इलय् होलीयात न्हूकथं हनेगु शुरुवात याःगु दु । किपूया स्थानिय कीर्तिपुर च्यानलया ग्वसालय् म्हिगः होलीयात ''छपासः गजल'' ज्याझ्वःयासें हंगु दु । होलीया पूर्व सन्ध्या इलय् लाय्कुलिइ थ्व ज्याझ्वः याःगु खः ।
नीलः साँस्कृतिक पुचःया होली धून लिसें न्ह्याःगु ज्याझ्वलय् कीर्तिपुर म्यूजिक एकेडेमिया निम्ह नच्चापिं (निमेस व अभय) मचातय्सं तबलाया सोलो न्ह्यब्वःगु खः । प्रसिद्ध गजलकार भाजु भूषण प्रसाद श्रेष्ठजुं नं होलीया बिकृतिया बारे थःगु गजल वाचनयानादीगु खः ।
किपूया गजल गायकिपिं ज्ञानेश्वर ''निभाः'', अमर माली, कृष्णमान डंगोल, तिर्थ माली, राजेश महर्जन, रिता महर्जन, मथुरा महर्जन, शतिस महर्जन, राजु महर्जन लिसें ख्वपया विजय कायष्ठ व यलया टंकराज शाक्यपिसं थःथःगु गजल न्ह्यब्वयादीगु खः । गजल नेवाः, नेपाली व हिन्दी स्वंगुलिं भाषं न्ह्यब्वःगु खः ।
ज्याझ्वः चान्हय् २:३० बजेतक न्ह्याःगु खःसा ग्वसाः खल: कीर्तिपुर च्यानलं तप्यंक प्रसारण नं याःगु खः ।
