नेपाल पर्यटन दँ २०११ सुरु

'पर्यटनया निंतिं नापनापं' धइगु नारा सहित नेपाल पर्यटन दँ २०११ औपचारिक रुपं सुरु जूगु दु । कासामि व कालाकारत्यसं लुम्बिनीं हःगु शान्तिदीप प्रधानमन्त्रीयात लःल्हायेवं पर्यटन दँ २०११सुरु जूगु खः ।

पर्यटन दँ सुरु जूगु घोषणा यायेत शुक्रवाः येँया तिंख्यलय् याःगु छगू ज्याझ्वः दथुइ प्रधानमन्त्री माधवकुमार नेपालं पर्यटन दँयात आर्थिक क्रान्ति यायेगु दँया कथं हनेमाःगु बिचाः प्वंकादिल । वय्कलं नेपालया हिमाल, पहाड व तराइलय् गाक्कं पर्यटनया सम्भावना दुगु खँ न्ह्यथंनादिसें पर्यटन विदेशी मुद्राया प्रमुख स्रोत जूगुलिं थुगु क्षेत्रयात विकास यायेमाःगु धयादिल ।

ज्याझ्वलय् पर्यटन मन्त्री शरदिसंह भण्डारी, पर्यटन दँ ज्याझ्वः कार्यान्वयन समितिया राष्ट्रिय संयोजक योगेन्द्र शाक्य, नेपाल उद्योग वाणिज्य महासंघया अध्यक्ष कुशकुमार जोशी लगायतं देशय् पर्यटन उद्योगया निंतिं सकारात्मक भूमिका म्हितेत दक्वसितं इनाप यानादिल ।

शुक्रवाः न्हिनय् ज्याझ्वः सुरु जुइ न्ह्यः येँया थीथी थासं राजनीतिक दलया नेता, कार्यकर्ता, कासामि, कलाकर्मी, संचारकर्मी लगायत थीथी पेशाकर्मीत र्‍याली पिथनाः तिंख्यलय् थ्यंकूगु खः ।

सरकारं पर्यटन दँय् विश्वन्यंकया झिगू लख पर्यटकत नेपाः हयेगु ताः तःगु दु । पर्यटन दँया निंतिं माओवादी, कांग्रेस, एमाले लगायत झिंगुंगू राजनीतिक दलं वइगु दँय् बन्द हड्ताल थंज्याःगु ज्याझ्व: मयायेगु प्रतिबद्धता प्वंकेधुंकूगु दु ।