राप्रपा नेपालं ल्वाभः ल्ह्वना: आन्दोलन यायेगु ख्याच्वः
राप्रपा नेपालया नेतातय्सं राष्ट्रिय स्वार्थया निंतिं ल्वाभः ल्ह्वनेगु ख्याच्वः ब्यूगु दु । मंगलवा: सिंहदरवार घेराउलिपा बसन्तपुलीइ ग्वसाःग्वःगु कोणसभायात सम्बोधन यानादिसें राप्रपा नेपालया नेतात राजेन्द्र लेङदेन व सभासद कुन्ती राईं मालधाःसा ल्वाभः ल्ह्वना: आन्दोलन यायेगु ख्याच्वः ब्यादीगु खः ।
अथेहे सभायात सम्बोधन यानादिसें राप्रपा नेपालया नाय: नापं जनआन्दोलन-२या द्वपं लाम्ह व लिपांम्ह जुजु ज्ञानेन्द्र शाहया जवः ल्हाःकथं कयातःम्ह कमल थापां दरबार हत्याकण्डया छानबिन यायेत सरकारयात हाथ्या बियादिल । वय्कलं न्हापा ज्ञानेन्द्रं थ: दाजुयात स्याना: दरबार हत्याकण्ड या:गु धाइपिं नेतात आ: सरकारय् दुगु धयादिसें पुसा: हत्याकाण्डया छानबिन याना: दोषीयात कारवाही यायेत सरकारयात हाथ्या बियादिल ।
कोणसभा स्वयां न्ह्य: संवैधानिक राजतन्त्र, हिन्दु राज्य व संघीयताया विषयलय् जनमत संग्रहपाखें निर्णय यायेमाःगु माग यासें राप्रपा नेपालं खुघौ सिंहदरबार घेराउ याःगु ख: । घेराउया झ्वलय् राप्रपा नेपालया छगू दर्जन नेता-कार्यकर्तातय्त प्रहरीं ज्वंनायंकूगु ख: । घेराउया कारण सिंहदरबार क्षेत्र जःखःया यातायात सेवा प्रभावित जूगु खः । सुथय् गुताः इलंनिसें न्ह्याःगु घेराउ ज्याझ्वः न्हिनसिया स्वताः ईतक न्ह्याःगु खः । थ्वहे माग तयाः राप्रपा नेपालं सोमवा: स्वनिगः बन्द तकं याःगु खः ।
