सेना समायोजन व संविधान निर्माण नापनापं : मन्त्री श्रेष्ठ

भूमिसुधार व व्यवस्थामन्त्री डम्बरबहादुर श्रेष्ठं माओवादी लडाकु समायोजन व संविधान दयेकेगु प्रकृया नापनापं न्ह्यःने न्ह्यायेमाःगु खँ धयादीगु दु ।

झापाया बिर्तामोडय् मंगलवा: पत्रकार नापलायेगु ज्याझ्वलय् न्वंवानादिसें मन्त्री श्रेष्ठं निगूलिं ज्या छक्वःलं न्ह्यःने न्ह्याकेमाःगु खँ धयादीगु खः । संविधान घोषणा जुइत निन्हू-प्यन्हू ल्यं दुगु इलय् लडाकु समायोजन यायेमाःगु मन्त्री श्रेष्ठं धयादिल ।

माओवादीं धाःथें सरकारय् हिउपाः वइगु छु नं सम्भावना मदुगु दाबी यानादिसें वय्कलं क्वःछीनात:गु इलय् हे संविधान पिथना थ्वहे सरकारं न्हूगु चुनाव याकेगु दाबी यानादीगु खः । वर्तमान राजनीतिक पंगः क्वचायेकेगु निंतिं राजनीतिक दलत दथुइ सहमति, सहकार्य व एकताया विकल्प मदुगु खँय् मन्त्री श्रेष्ठं ब: बियादीगु ख: ।