झिंच्यागू बुँदे घोषणा पौ पिथंसें युवा सम्मेलन क्वचाल
'सम्वृद्धिया निंतिं युवा नेतृत्व' धइगु नारा बिया: सोमवा: निसें येँय् न्ह्याःगु राष्ट्रिय युवा सम्मेलन-२०६६ झिंच्यागू बुँदे घोषणा पौ पिथंसें क्वचाःगु दु । घोषणा पौस युवा मैत्री संविधान दयेकेमाःगु, ल्याय्म्हपिंत राज्यया मू प्रवाहस हयेमाःगु, जनसंख्याया आधारय् राज्यया हरेक तहलय् ल्याय्म्हपिनिगु प्रतिनिधित्व सुनिश्चित यायेमाःगु लगायतया माग याःगु दु ।
राष्टिय युवा संस्था महासंघ नेपालया ग्वसालय् सोमवा: निसें न्ह्याःगु सम्मेलनया निन्हूया न्हि उपराष्ट्रपति परमानन्द झां ज्याझ्वः क्वचायेकादीगु खः । सम्मेलन क्वचायेका दिसें उपराष्ट्रपति झां सामाजिक, राजनैतिक हिउपाःया निंतिं अग्रमोर्चाय् च्वनाः योगदान याःपिं ल्याय्म्हपिनिगु मागयात कार्यान्वयन यायेगु निंतिं थम्हं नं कुतः यायेगु धयादिल ।
राष्ट्रिय युवा संस्था महासंघ नेपालं जारी या:गु झिंच्यागू बुँदे घोषणा पौ उपराष्ट्रपति झा व संविधानसभाया सभासद चन्द्रबहादुर थापा 'सागर'पाखें सरकारयात न्ह्यब्वःगु ख: । माग पौ लःल्हाना कयादिसें माओवादीया सभासद् सागरं हक अधिकार कायेगु निंतिं ल्याय्म्हतय्सं हस्तक्षेप न्ह्याकेकारू भूमिका म्हितेमाःगु व उकिया निंतीम ग्वाहालि यायेत थः तयार दुगु धयादीगु खः ।
