कार्यदलया प्रस्ताव तयार यायेगु विषयस एमालेय् कचवं
नायः झलनाथ खनाल व मू छ्याञ्जे ईश्वर पोखरेलया राजनीतिक व सांगठनिक प्रतिवेदन पारित यायेवं ल्यं दनिगु झिंनिगू एजेण्डा दथुइ सहलह यायेत नेकपा (एमाले) केन्द्रीय समितीया बैठक मंगलवा: नं न्ह्याःगु दु ।
पार्टी मू ज्याकु बल्खुइ च्वंगु बैठकय् कार्यविभाजन लगायतया विषयस सहलह जूगु जानकारी एमाले नेता विष्णु रिमालं बियादिल । म्हिगः खुन्हूया दिंया बैठकं एमालेया नायः खनालं न्ह्यब्वयादीगु राजनीतिक प्रतिवेदन परिमार्जनलिसें पारित याःगु खः । अथेहे मू छ्याञ्जे पोख्रेलं न्ह्यब्वयादीगु सांगठनिक प्रतिवेदन नं पारित जूगु दु ।
केन्द्रीय समितिया झिंप्यंगू एजेण्डा मध्य निगू एजेण्डाय् बहस क्वचाःसां नं कार्यदलया प्रतिवेदन व कार्यविभाजनय् कचवं ताःहाकः जुइफूगु खँ बैठकय् ब्वति दुम्ह छम्ह नेता जानकारी ब्यादीगु दु ।
थुखे राजनीतिक निकासया निंतिं प्रस्ताव तयार यायेत नीस्वंगु कार्यदलया प्रस्ताव तयार यायेगु विषयस कचवं पिदनेवं बैठकय् न्ह्यब्वयेफुगु मदुनि । शान्ति व संविधानया निंतिं राष्ट्रिय सहमति धइगु मू नारा न्ह्यःने न्याकूसां नं सहमति गुकथं सम्भव यायेगु धइगु विषयस प्रतिवेदन मौन दुगु खँ नायः खनाल पक्षया छम्ह दुजलं जानकारी ब्यूगु दु ।
