राजस्व बाँडफाँट समितिया प्रतिवेदनय् सहलह

संविधानसभाया संवैधानिक समितिया मंगलवा: च्वंगु बैठकय् संविधानसभापाखें सुझाव व उजंलिसे पारित जुयावःगु प्राकृतिक स्रोत, आर्थिक अधिकार व राजस्व बाँडफाँट समितिया प्रतिवेदनय् सहलह जूगु दु । प्रतिवेदनय् न्ह्यथनातःगु विषयवस्तुयात संविधानसभाया सुझाव व उजंकथं संविधानया मस्यौदाय् छु भागय् गुकथं दुथ्याकेगु धइगु सम्बन्धय् छसिकथं सहलह याःगु खँ बैठकय् ब्वति काम्ह छम्ह दुजलं जानकारी ब्यूगु दु ।

राज्यव्यवस्था समितिया बैठक स्थगित

उखे राज्यव्यवस्था समितिया थौंया बैठक नं च्वं हे मच्वंसें स्थगित जूगु दु । राप्रपा नेपालं याःगु सिंहदरवार घेराउया हुनिं सभासदत बैठकय् ब्वति कायेमफयेवं बैठक स्थगित जूगु खँ समितिया दुजः दीनानाथ शर्मां कनादिल । बैठकय् प्रधानमन्त्री माधवकुमार नेपाललिसे भारतपाखें हःगु ल्वाभः व मेगु चुनाव याकेगु धकाः ब्यूगु अभिव्यक्तिबारे स्पष्टीकरण कायेगु क्वःछीनातःगु खः ।