थौं जमीम शाहया शवयात्रा
येँ (सन्ध्या टाइम्स)/वंगु आइतवाः न्हिनय् हे गोलीं कयेकाः स्याना बिउम्ह संचारकर्मी जमीम शाहया थौं शवयात्रा याइगु जूगु दु। वय्कःया शवयात छेँय् हे अन्तिम श्रद्धांजलिया लागिं तयातःगु खः ।
वय्कःया छेँ पानीपोखरीं शवयात्रा यानाः लाजिम्पाट, लैनचौर, सोह्रखुट्टे, विजेश्वरी जुयाः स्वयम्भुया कब्रिस्तानय् इस्लामिक परम्परा कथं वय्कःयात समाधिस्थ यायेगु ग्वसाः दयेकातःगु दु। पिहां वनाच्वंपिं वय्कःया थःथितिपिं मथ्यंगुलिं थौ जक अन्तिम संस्कार यायेत्यंगु खः।
१ घण्टा टिभी बन्द
संचारकर्मी जमीम शाहया हत्याया विरोधय् नापं वय्कः प्रति सम्मान बीत थौं नेपाःया फुक्क हे टेलिभिजन च्यानलत १ घण्टा बन्द याइगु जूगु दु। थौं बहनी ७ बजेनिसें ८ बजे तक देय्या फुक्कं टेलिभिजन च्यानलत बन्द यायेगु ग्वसाः दयेकूगु दु। अथे हे थीथी केबुल संगठनतय्सं नं थौं १ घण्टा च्यानल बन्द यायेगु घोषणा याःगु खः। शाह नेपालय् निजी टिभी व केवल शुरु याःम्ह न्हापांम्ह व्यवसायी खः ।
