विद्यार्थीतय् करोडौं दां डुबे जुइगु खतरा

बेलायतय् भिसा बन्द

येँ (सन्ध्या टाइम्स)/बेलायतं थःगु देशय् आखः ब्वं वइपिं विद्यार्थीतय्त भिसा बीगु ज्या आकाझाकां बन्द याना बीवं उखे वनेत तयारी यानाच्वंपिं नेपाःया आपालं विद्यार्थीत अन्यौलग्रस्त जूगु जक मखु उमिसं थुकिया निंतिं खर्च याःगु करोडौं दां तकं डुबे जुइगु खतरा ब्वलंगु दु ।

बेलायतय् आखः ब्वं वनेगु धकाः आपालं विद्यार्थीतय्सं अन च्वंगु थीथी कलेजतय्त द्वःछि पाउण्ड शुल्क नापं पुला तयेधुंकूगु दु। यदि थःपिं वने मखन धाःसा थ्व शुल्क डुबे जुइफु। उकिं थज्याःगु शुल्क पुलाः भिसा वइ धकाः पियाच्वंपिं आपालं विद्यार्थीतय् दां व भविष्य नितां अन्यौलय् लानाच्वंगु दु। भिसाया लागिं निवेदन बिसें आः तक ४००० म्ह विद्यार्थीतय्सं अज्याःगु शुल्क पुलेधुंकूगु दु। उकी मध्ये १५०० या भिसा स्वीकृत जुइधुंकूगु धासें भ्वं जक वयेमानिगु खः ।

बेलायतय् आखः ब्वं वनेत माःगु शुल्क, बैंक ब्यालेन्स, हवाई टिकट, बेलायतया कलेजयात पुलेमाःगु दां आदिया लागिं गुलिखे विद्यार्थीया अभिभावकतय्सं बैंकय् त्यासा कया हःगु दु। यदि वने मखन धाःसा त्यासा ब्याजं हे जँ त्वःथुलीगु खँ नं चिन्तित अभिभावकतय्सं धयाच्वंगु दु ।

बेलायतया युके बोर्डर्स एजेन्सीपाखें नकतिनि थज्याःगु निर्णय याःगु खः। बेलायतं याःगु निर्णय जूगुलिं नेपाः सरकारं नं छुं याये फयाच्वंगु मदु। बेलायतय् आखः ब्वंके छ्वयेगु प्रवन्ध याना बीपिं कन्सल्टेन्टत थ्व निर्णयं यानाः हैरान जुयाच्वंगु दु। निर्णय संशोधन यायेत उमिसं नेपाः व बेलायत निगुलिं देशय् पहल यानाच्वंगु दु धाःसां लिच्वः सकारात्मक जुइगु सम्भावना धाःसा म्हो जक दुगु खँ धाःगु दु। नेपाः सरकारं धाःसा छुं पहल यानाच्वंगु सी मदुनि ।