नेप्से १३ अंकं थहां वन
येँ (सन्ध्या टाइम्स)/स्टक एक्सचेन्जय् शेयर कारोबारं बजार परिसुचक नेप्से कुहां वयेगु क्रम दिउगु दु। थुगु दँया वंगु श्रावणया अन्तपाखें निसें मदिक कुहां वयाच्वंगु नेप्से वंगु वाः जक ५०० अंकं क्वय् कुहां वयाः थुगु वालय् ५८० तक थ्यंगु खःसा म्हिगः छन्हुया कारोबारं १३ अंकं थहां वंगु दु।
वाणिज्य समुहया कारोबार मदिक कुहां वयाच्वंगु कारणं थुकिया लिच्वः नेप्सेय् लानाच्वंगु खःसा थुकिया सुधारया लिसें नेप्से नं थहां वंगु खः। थ्वकुन्हुया कारोबारं नेप्से १३ दशमलव १५ अंकं थहां वनाः ४९२ दशमलव ८८ अंकय् थ्यंगु दु। लिसें नेप्सेया नापं सेन्सेटिभ ३ दशमलव ३६ व फ्लोट १ दशमलव २१ अंकं सुधार जुयाः थहां वंगु दु ।
म्हिगःया कारोबारय् वाणिज्य समुह १८ दशमलव २८ अंकं, थ्व धुंकाः अन्य समुह १८ दशमलव ८ अंकं, वीमा समुह शुन्य दशमलव ५५ अंकं व जलविद्युत शुन्य दशमलव ४३ अंकं थहां वंगु दु। मेखे विकास बैंक ६ दशमलव ३४ व फाइनान्स समुह १ दशमलव ७९ अंकं कुहां वल ।
स्टक एक्सचेन्जया कथं थ्व कुन्हु ख्वीस्वंगू कम्पनीया शेयर कारोबार जुयाः न्हय्गुद्वः सछि व स्वीस्वंगू कित्ता शेयर न्याये-मी जुयाः स्वंगू करोड न्हय्च्यागू लख पीन्याद्वः तका दांया कारोबार जुल ।
शेयर कारोबार जूगु कम्पनी मध्ये स्टायण्डर्ड चार्टर्ड बैंक दांया ल्याखं दकलय् अप्वः न्यय्च्यागू लख न्हय्न्याद्वः तका दांया कारोबार याःगु दु। नेपाल इण्डष्ट्रियल एण्ड कम. बैंकं दकलय् अप्वः कमे याःगु दुसा उखे गोर्खा डेभलपमेण्ट बैंक दकलय् अप्वः द्यापं फःगु दु ।
