पन्तिइ नेपालभाषा बाखं गोष्ठी

पन्ति (सन्ध्या टाइम्स)/बाखं दबूया ग्वसालय् वंगु सनिवाः पन्तिइ नेपालभाषा बाखं गोष्ठी जुल। सिद्धार्थ वनस्थली स्कुलया प्रिन्सिपल लक्ष्मण राजवंशीया सभापतित्वय् जूगु थुगु गोष्ठीइ च्वमिपि काशिराम विरस, मोहिनी चित्रकार, सुजिता माःजु, मथुरा साय्मि, सौरभ शाक्य, पुष्परत्न तुलाधर, गोविन्द श्रेष्ठ, भगतदास श्रेष्ठ, सिला साय्मि, केदार सितु, रितादेवी प्रधान, श्याम आशा, दया खड्गी बैचेन, कृष्णभक्त बोडे, लक्ष्मण राजवंशी, मिना बज्राचार्य, सुमा श्रेष्ठ व विमल ताम्रकारपिंसं बाखं ब्वनाः न्यंकादीगु खः ।

दबूया बाखं च्वमि राजा शाक्यं न्ह्याकादीगु थुगु ज्याझ्वलय् ब्वंगु फुक्कं बाखंयात प्रा. प्रेमशान्ति तुलाधरं समीक्षा यानादीगु खः। न्यापु खुपु बाखं ब्वनेवं उकियात कयाः दथुइ टिप्पणी यायेगु ज्या नं जूगु खः। थुकी च्वमिपिं लिसें सहभागीपिंसं नं थःथःपिनि नुगःखँ प्वंकादीगु खः।
बाखं बारे कनादिसें मुँज्या नायः लक्ष्मण राजवंशीं समग्रय् बाखं धइगु पुसा खः उकी च्वमिं स्वां ह्वयेकी, गबलें गबलें मुखू जक नं क्यना बियाच्वनी धकाः थःगु धापू स्पष्ट यानादिल।
नेपालभाषाया बाखं बिधायात च्वन्ह्याका यंकेगु व बाखं च्वमिपिंत थासंथासय् यंकाः गोष्ठी यानाः थीथी अनुभव याके बीगु ताः तयाः बाखं दबुलिं थुकथं मदिक्क बाखं मुँज्या याना वयाच्वंगु खः। लछि ति न्ह्यः नं थुकथं हे बाखं दबूपाखें नारायणगढ, बुटवलय् व लुम्बिनी वनाः बाखं गोष्ठी यानावःगु खः ।