शरणार्थी लितयंकादिसं : प्रम
प्रधानमन्त्री माधवकुमार नेपालं स्वंगू देशय् पुनस्थापना यानाः शरणार्थी समस्या समाधन जुइमफइगुलिं नेपालय् दुगु भुटानी शरणर्थीत भुटानय् यंकेत इनाप यानादीगु दु ।
नेपाः भ्रमणय् झयादिम्ह भुटानी अर्थमन्त्री लिम्पो खान्दु वाङचुकनाप बुधवा: सुथय् खँल्हाबंला यानादिसें प्रधानमन्त्री नेपालं शरणर्थी पुनस्थापना याःगुलिं नेपालय् नं आत्महत्या थंज्याःगु घटना अप्वया वंगु व समस्या जटिल जुयवनाच्वंगुलिं याकनं शरणार्थीतय्त भुटान लितयंकेत इनाप यानादीगु खः ।
उगु इलय् भुटानी अर्थमन्त्री वाङचुकं नेपाः सरकराया इनापयात भुटानी प्रधानमन्त्रीया थाय् थ्यंकेथु प्रतिबद्धता प्वंकादिल । नेपालय् वंगु नीदँ निसें छगू लखं अप्वः भुटानीत नेपालय् शरणर्थी जुयाच्वनाच्वंगु दु ।
खँल्हाबंलाया झ्वलय् वाङचुकं भुटानया राजधानी थिम्पुइ जुइगु दक्षिण एसियाली क्षेत्रीय सहयोग संगठन सार्कया झिंखुक्वःगु शिखर सम्मेलनय् ब्वति कायेत अनया प्रधानमन्त्रीं छ्वःगु ब्वनापौ लःल्हानादिल । झिंखुक्वःगु सार्क सम्मेलन वइगु अप्रिल २८ व २९ तारिख कुन्हु थिम्पुइ जुइगु ज्याझ्वः दु ।
वइगु सार्क शिखर सम्मेलनया मुख्य कार्यसूची समेत जलवायु परिवर्तन जुइगुलिं पर्वतीय देय्या गठबन्धन दयेकेत न्ह्या: वनाच्वंगु नेपाःयात भुटानया साथ दइगु आश्वासन भुटानी अर्थमन्त्री वाङचुकं बियादिल ।
