जमिम हत्या प्रकरण : प्यम्ह प्रहरी निलम्बित / संचारकर्मीतय् विरोध
स्पेशटाइस नेटवर्क व च्यानल नेपालया अध्यक्ष जमिम शाहयात स्याःगु इलय् सुरक्षाय् लापरवाही याःगु धासें प्यम्ह प्रहरीयात निलम्बन याःगु दु ।
मंगलवाः महानगरीय प्रहरीया ज्याकूथीं छगू पत्रकार सम्मेलन यानाः प्यम्ह प्रहरीयात निलम्बन याःगु जानकारी ब्यूगु खः । निलम्बनय् असाई लोकेन्द्र पण्डित, हवल्दार तुलबहादुर अधिकारी, प्रहरी जवनात दुर्योधन यादव व अनिल राई लाःगु दु । पत्रकार सम्मेलनय् महानगरीय प्रहरी प्रमुख एसपी गणेश केसीं निलम्बित प्रहरीत थःगु जिम्मेवारी पूवंके मफुगुलिं निलम्बित यानाःगु कनादिल ।
अथेहे अपराधीतय्सं शाहयात स्यायेत छ्यःगु बा. १७. प. ८७३३ नम्बरया मोटरसाइकल यल महालक्ष्मी स्थित मितेरी सेभिङ एण्ड कोअपरेटिभ लिमिटेडया जूगु खँ नं एसपी केसीं कनादिल । उगु मोटरसाइकल येँया फुटुङय् वेवारिसे अवस्थाय् मंगलवाः हे प्रहरीं लुइकूगु खः ।
थ्वहे दथुइ घटनाया विरोधय् मंगलवाः येँ संचारकर्मीतय्सं विरोध प्रदर्शन याःगु दु । नेपाल पत्रकार महासंघया अगुवाई भृकुटीमण्डप पाखें शुरु जूगु विरोध जुलुस सुन्धारा थ्यंकाः कोणसभाय् ह्यूगु खः । जुलुसय् संचारकर्मी लगायत नागरिक समाजया दुजत, मानवअधिकारकर्मी लगायत सर्वसाधारतय् उपस्थिति दुगु खः ।
