'न्हूगु संविधानया निंतिं ई तनेगु मानसिकता'

येँ (सन्ध्या टाइम्स)/संघीय गणतन्त्र नेपाःया न्हूगु संविधान वइगु जेष्ठ १४ गते जारी यायेगु धकाः अन्तरिम संविधानय् न्ह्यथनातःगु कारणं वहे ईया दुने संविधान दयेकेमाः मखुसा तःधंगु संकट वइ धया जूपिं राजनीतिक दलया नेतात हे आः संविधानया निंतिं ई थपे यायेमाःगु मानसिकताय् वःगु दु। क्वःछिनातःगु ई तकया दुने न्हूगु संविधान दयेके मफइगु तायेका आः याकनं हे संविधानय् संशोधन यानाः संविधान जारी यायेगु ई लिछ्यायेगु मानसिकता संविधानसभाय् दुथ्याःगु राजनीतिक दलया नेतातय्सं दयेकाहःगु दु ।

संविधान दयेकेगु निंतिं प्रारम्भिक मस्यौदा तयार यायेत संविधानसभाया झिंछगुलिं हे समितिं थःथःपिनि प्रारम्भिक मस्यौदा तयार यानाः संविधानसभाय् लःल्हाये धुंकूगु दुसां अनं लिपा यायेमाःगु तयारीया निंतिं धाःसा ई मगाइगु तायेकाः उकिया निंतिं ई अप्वयेकेगु मानसिकता नेतातय्सं दयेकाहःगु खः। न्हूगु संविधान दयेकेगु नितिं आः ज्या याये माःगु समितित मध्ये संविधानसभाया संवैधानिक समिति व प्रतिवेदन अध्ययन समिति खः। अध्ययन समितिपाखें तयार याःगु प्रतिवेदन संवैधानिक समितिइ वने धुनेवं प्रारम्भिक संविधान संवैधानिक समितिं दयेकेमाःगु खः। आः तकया दुने अध्ययन समितिपाखें तयार याना छ्वयेधुंकूगु प्रतिवेदन धइगु प्राकृतिक स्रोत समितिया खः। वहे प्रतिवेदनयात कयाः म्हिगः संवैधानिक समितिइ मुँज्या जूगु इलय् मेगु झिगू समितिया प्रतिवेदन वयेमानिगु नापं फागुन २१ गते तकया दुने प्रारम्भिक संविधान तयार यायेगु धइगु थाकुगु ज्या जुल धकाः न्ह्यथँसें एकिकृत नेकपा (माओवादी)या नेतां आः संवैधानिक समितिया ई अप्वयेकेमाः धकाः प्रस्ताव तःगु इलय् कांग्रेसया नेतातय्सं तकं समर्थन याःगु खः। थ्व धइगु संविधान जारी यायेगु ई थप यायेगु मानसिकता नेतातय्सं दयेका हःगुया संकेत खः धाःसां छुं मपाइगु खँ धयाहःगु दु ।