कांग्रेस बैठक जुयाच्वंथाय् कांग्रेसी धर्ना
येँ (सन्ध्या टाइम्स)/नेपाली कांग्रेस कन्द्रीय कमिटीया बैठक जुयाच्वंगु थासय् हे कांग्रेस कार्यकर्तातय्सं धर्ना बिउगु दु। थौं पार्टीया मू ज्याकू सानेपाय् थ्व धर्ना बिउगु खः ।
पार्टीया बैठक १ बजे लिपा जक च्वनेगु धयातःगु खःसां नेपाली कांग्रेसया भ्रातृ संगठन नेपाल तरुण दलया येँ जिल्ला नेतृ जीवन डंगोलया नेतृत्वय् १२ बजेनिसें हे अन धर्ना च्वंगु दु ।
तरुण दलया न्हय्न्यागुलिं हे जिल्ला समिति मध्ये येँ जिल्ला छगुली जक मिसाम्ह कार्यकर्तां नेतृत्व याये फइगु अवस्था दुगु खँयात पार्टी नेतृत्वं वेवास्ता यानाः मेम्ह हे मनूयात नायः दयेकूगु कारणं उकिया विरोध यासें मय्जु जीवन डंगोलयात हे नायः दयेकेमाः धकाः माग यासें उगु धर्ना च्वंगु खः। न्हापा नेपाली कांग्रेस निगू जुयाच्वंगु इलय् कोइराला कांग्रेस पक्षीय तरुण दलया येँ जिल्लाया मिसाम्ह नेतृ मय्जु जीवन डंगोल अध्यक्ष जुयाच्वंगु खःसा पार्टी एकता जुइवं तरुण दल नं एकता जूगु व उगु इलय् येँ जिल्लाया नायः कथं गोकर्ण केसीयात तये हःगु खः। अनंनिसें हे तरुण दल येँ जिल्लाय् नेतृत्व विवाद ब्वलंगु खः। जीवन डंगोल पक्षीय कार्यकर्तातय्सं मिसापिं नेतृत्वय् हयेगु ज्याय् कांग्रेसया नेतातय्सं वेवास्ता याःगु द्वपं बिसें थ्व विरोध यानाच्वंगु खः ।
