बजाः भाः नियन्त्रणय् सरकारी हस्तक्षेप
येँ (सन्ध्या टाइम्स)/प्रधानमन्त्री माधव कुमार नेपालं लाथेपाथे ढंगं थहां वनाच्वंगु बजाः भाः राज्यं हस्तक्षेप यानाः नियन्त्रण यायेगु खँ धयादीगु दु। प्रम नेपालं थुगु खँ नेपाल औद्योगिक विकास निगमया आधुनिक बैंकिङ्ग सेवाया उलेज्याया झ्वलय् कनादीगु खः ।
बजाःया थौंकन्हय्या भावय् एकरुपता मदुगुलिं बजारं क्वःछिनातःगु भावय् सरकार वने मफइगु नं प्रम नेपालं धयादीगु दु। अथे हे औद्योगिक प्रवर्द्धनया नामय् विदेशं सामान आयात यानाः स्टक तयाः हाकनं विदेश छ्वयेगु प्रवृत्ति अप्वया वनाच्वंगुलिं नेपाःया उत्पादनं अन्तर्राष्ट्रिय बजारय् थाय् काये मफुगु धासें थःगु मेहनतं कुतः याइपिंत प्रोत्साहन बीगु नं धयादीगु दु ।
उगु इलय् प्रम नेपालं म्हो इलय् गुणस्तरीय व म्होचा खर्चं आर्थिक उन्नति यायेफइगु विश्वास प्वंकादिल। ज्याझ्वलय् अर्थ मन्त्री सुरेन्द्र पाण्डें सरकारी संस्थायात नं व्यवसायीक रुपं प्रतिस्पर्धी जुयाः न्ह्याः वनेत सरकार नं व्यवसायी जुयाः वयेमाःगु खँय् बः बियादिल। मन्त्री पाण्डें आपालं सरकारी संस्थात व्यवसायीक व प्रतिस्पर्धी जुइमफुगुलिं अज्याःगु संस्थाया वित्तीय अवस्था निराशाजनक जूगु खँ न्ह्यथनादिल।
उगु ज्याझ्वलय् उद्योग मन्त्री महेन्द्रराय यादव, नेपाल राष्ट्र बैंकया डेपुटी गभर्नर कृष्ण बहादुर मानन्धर, राष्ट्रिय योजना आयोगया उपाध्यक्ष डा. युवराज खतिवडा, अर्थ सचिव रामेश्वर खनाल लगायतयापिंसं देय्या वर्तमान आर्थिक अवस्ता, समस्या व समाधानया लँपु मालेमाःगु खँ कनादीगु खः ।
