इलय् हे संविधान निर्माण यायेमाः : गच्छदार
उपप्रधानमन्त्री विजयकुमार गच्छदारं संविधानसभाया ई तनेमज्यूगु खँ धयादीगु दु । वयेकलं संविधान जारी यायेगु निर्धारित ई जेठ १४य् हे संविधान जारी यायेमाःगु धयादिल ।
नेपाल पत्रकार महासंघ दाङ शाखां मंलगवाः सुथय् घोराहीलय् याःगु पत्रकार नापलायेगु ज्याझ्वलय् न्ववानादिसें वयेकलं संविधान इलय् हे जारी यायेत तःधंगु दलत जिम्मेवार जुइमाःगु धयादिल । वयेकलं स्वंगू तःधंगु दलत माओवादी, कांग्रेस व एमालेया दथुइ सहमति जुसाः संविधान जारी यायेत याक्व ई म्वाःगु धयादिल ।
वयेकलं दक्वं विषयगत समितिं संविधानसभाय् प्रतिवेदन लःल्हायेधुंकूगुलिं आः संविधान च्वयेगु ज्या जक ल्यं दनीगु धयादिल । वयेकलं आः यक्वः ज्या मदुगुलिं संविधानसभाया ई तनेगु खँ यायेमज्यूगु धयादिल । वयेकलं इलय् हे संविधान निर्माण मजुसाः देय् तःधंगु द्वन्द्वय् फसे जुइगु बिचाः प्वंकादिल ।
अथेहे वयेकलं उच्चस्तरीय राजनीतिक संयन्त्र सरकार क्वथलेगु कासाय् लगेजूगुलिं थुकी सरकारया विश्वास मदुगु धयादिल । वयेकलं प्रधानमन्त्री व मधेशवादी दलया ब्वति बिना संयन्त्र पूर्ण मजुइगु व थुकीं राष्ट्रिय समस्याया समाधानया निंतिं छुं यायेमफुइगु धयादिल ।
