संसदया बजेट अधिवेशन क्वचाल
व्यवस्थापिका संसदया बजेट अधिवेशन सोमवाः क्वचाःगु दु । सभामुख सुवासचन्द्र नेम्वाङं संसदया खुक्वःगु अधिवेशन सोमवाः बहनी क्वचाःगु जानकारी बियादीगु खः । वंगु असार २४ गते निसें न्ह्या:गु अधिवेशनय् सरकारया नीती-ज्याझ्वः व बजेट पारित याना: बजेट अधिवेशन २१६ न्हि लिपाः सोमवाः बहनी क्वचाःगु दु ।
संसदया थ्वहे अधिवेशनया असार २५ गते राष्ट्रपति डा. रामवरण यादवं सरकारया नीति व ज्याझ्वः न्ह्यब्वयादीगु खः । उकीयात स्वन्हु लिपाः पारित याःगु खः । अथेहे असार २९ अथे अर्थमन्त्री सुरेन्द्र पाण्डें न्ह्यब्वयादीगु बजेट मंसिर १० गते पारित जूगु खः ।
माओवादीं नागरिक सर्वोच्चताया माग यासें असार २३ गते निसें संसद अवरुद्ध याःगु खःसा लिपाः बजेट पारित याकेत मंसिर ३ गते निति संसद सुचारु या:गु खः ।
थुगु अधिवेशनय् झिंगुंगू सरकारी व स्वंगू गैर सरकारी विधेयन दर्ता जूगुली न्हय्गू विधेयक पारित जूगु दु । थ्वस्वयां न्ह्यः हे दर्ता जूगु स्वंगू विधेयक नं पारित जूगु दु ।
वइगु जेठय् हे बजेट अधिवेशन सतेमाःगुलिं विधेयक अधिवेशन याकन हे सतेमाःगु अवस्था दुसां उकीयात गुवलय् सतेगु धइगु निर्णय सरकारं मयानी ।
