थनिनिसें जानजातिया क्षेत्रीय भेला
येँ (सन्ध्या टाइम्स)/आत्मनिर्णया अधिकार, जातीय स्वायत्तता नापं स्वशासनया माग यानाः आन्दोलन याना वयाच्वंगु आदिवासी जनजाति वृहत्त मोर्चा नेपालं थनिंनिसें देय्न्यंकं क्षेत्रीय भेला न्ह्याकीगु जूगु दु। सछिगुलिं मल्याक जातीय खलः पुचः, राजनीतिक दलत दुथ्याकाः दयेकूगु उगु मोर्चां थौं पोखराय् उकथं क्षेत्रीय भेला यायेत्यंगु खः। अथे हे माघ २७ गते नेपालगंजय्, २९ गते नारायणघाटय्, फागुन २ गते धरानय् अथे भेला यायेगु नापं क्षेत्रीय भेला जूगु थासय् जिल्ला स्तरीय मोर्चा नं नीस्वनेगु जुइ धकाः धाःगु दु। थ्व हे झ्वलय् वइगु फागुन १४ गते येँय् मोर्चाया राष्ट्रिय भेला यानाः थःपिनि अधिकारया निंतिं सशक्त कथं न्हूगु चरणया आन्दोलन घोषणा यायेगु जुइ धकाः दु। संविधानसभां वइगु फागुन १५ संविधानया मस्यौदा घोषणा यायेमाःगु कारणं फागुन १४ गते राष्ट्रिय भेला यानाः माःगु कथंया संघर्षया ज्याझ्वः तयार यायेगु जुइ धकाः मोर्चाया छ्याञ्जे डा. कृष्णबहादुर भट्टचनं 'सन्ध्या टाइम्स'यात कनादीगु दु ।
