तरुण दलया येँ जिल्लाय् विवाद
येँ (सन्ध्या टाइम्स)/नेपाली कांग्रेसया भ्रातृ संगठन नेपाल तरुण दलया येँ जिल्लाय् नेतृत्वया विवाद जुयाः उगु संगठनया कार्यकर्ता जीवन डंगोलया नेतृत्वय् म्हिगः छथ्वः कार्यकर्तात पार्टीया केन्द्रीय ज्याकू सानेपाय् धर्ना च्वनेगु ज्या यात। तरुण दलया न्हय्न्यागू हे जिल्ला कमिटीत मध्ये येँ जिल्लाय् जक मिसाम्ह जीवन डंगोलया नेतृत्वय् जिल्ला कमिटी दुगु खँयात वास्ता मयासे प्रकासमान सिंहया नेतृत्वय् दुगु छगू समितिं तत्कालिन नेपाली कांग्रेस प्रजातान्त्रिक पार्टीया तरुण दलया नायः गोकर्ण केसीयात नायः दयेकाः तरुण दल येँ जिल्ला कमिटी दयेकूगु खः। जिल्ला कमिटी मध्ये छम्ह जक मिसाया नेतृत्वय् दुगुयात मान्यता मबिसे ज्या यात धकाः न्ह्यथनाः जीवन डंगोलयात हे येँ जिल्ला कमिटी दयेकेमाःगु माग यानाः उकथं म्हिगः धर्ना च्वंगु खःसा कन्हय् पार्टीया केन्द्रीय कमिटीया मुँज्या च्वनीगु जुयाः उगु इलय् नं थःपिं धर्ना च्वनेगु जुइ धकाः जीवन डंगोलं धयादीगु दु ।
