हत्यारायात कारवाही जुइ : प्रम

प्रधानमन्त्री माधवकुमार नेपालं संचार उद्यमी जमिम शाहया हत्या घटनाया बारे सरकारं याकन अनुसन्धान यानाः हत्यारायात कारवाही याइगु खँ धयादीगु दु ।

मदुम्ह शाहया छेँजःयात नापलायेत वयेकया पानीपोखरीइ च्वयंगु छेँय् थ्यंकादिम्ह प्रधानमन्त्री नेपालं दोषीयात कडा कारवाही यायेगु खँ धयादीगु खः । वयेकलं थुगु घटनायात सरकारं गम्भीरता पूर्वक अनुसन्धान याइगु व याकन स्वयां याकन हत्यारायात कारवाही यायेगु विश्वास प्वंकादीगु खः ।

उगु इलय् उद्यमी शाहया अबुं प्रहरी प्रशासनया कमजोरीया कारणं थः काय्या हत्या जूगु गुनासो प्रधानमन्त्री समक्ष प्वंकादीगु खः । अथेहे वयेकलं थः काय्या थें मेपिं सुयां नं काय्या हत्या मजुइमाः धकाः प्रधानमन्त्रीयात धयादीगु खः ।

प्रधानमन्त्री नेपाल वनमन्त्री दीपक बोहरा व गृहराज्यमनत्री रिजवना अन्सारी नापं शाहया छेँय् थ्यंकादीगु खः । वस्वयां न्ह्यः प्रधानमन्त्रीं शाहया हत्याया बारे सुरक्षा अधिकारीत पाखें जानकारी कयादीगु खः । उगु इलय् प्रधानमन्त्रीं अपराधीयात याकन ज्वनेत व सुरक्षा अवस्था क्वातुइकेत सुरक्षा निकायया अधिकारीतय्त निर्देशन बियादीगु खः ।

Share