दक्वं अयोग्य लडाकुतय् बिदाइ
राष्ट्र संघीय मिसन अनमिनं प्रमाणित याःगु एकीकृत नेकपा (माओवादी)या दक्वं आयोग्य लडाकुतय् बिदाइ ज्याझ्वः क्वचाःगु दु । सोमवाः लिप्पांगु बिदाइ ज्याझ्वः कथं रोल्पाया दहवनय् च्वंगु माओवादी शिविरय् दुपिं २८३ म्ह अयोग्य लडाकुया विदाइ नापं लडाकु बहिर्गमन प्रक्रिया क्वचाःगु दु । दहवनया शिविरय् दुपिं ३९६ म्ह अयोग्य लडाकुत मध्ये गुलिसिनं न्हापा हे शिविर त्वतेधुंकूगु दु ।
अनमिनं स्वदँ न्ह्यः प्रमाणिकरण याःपिं २९७३ म्ह लडाकुत नाबालिग जूगुलिं अयोग्य ठहर याःगु खः । लछि न्ह्यः शुरू जूगु बहिर्गमन प्रक्रिया दुहवनय् दुपिं अयोग्य लडाकुतय्त बिदाइ यासें क्वचा:गु दु ।
बिदाइ ज्याझ्वलय् माओवादी अध्यक्ष पुष्पकमल दाहाल 'प्रचण्ड', जनमुत्ति सेनाया प्रमुख नन्दकिशोर पुनं 'पासाङ', डेपुटी कमान्डर चन्द्रप्रकाश खनाल 'बलदेव', अनमिन प्रमुख करिन ल्यानग्रेन लगायतया ब्वति दुगु दु ।
शिविरं बिदाइ याःपिं अयोग्य लडाकुतय्त सरकार व संयुक्त राष्ट्रसंघया पुनस्थपना सम्बन्धी प्याकेज उपलब्ध याइगु खँ अनमिनं धाःगु दु । अयोग्यतय्त औपचारिक शिक्षा, व्यावसायिक तालिम, स्वास्थ्यकर्मीया तालिम व लघु उद्यम चायेकेगु आवश्यक तालिम बीगु खँ धाःगु दु ।
अथेहे अनमिन प्रमखु करिन ल्यानग्रेनं अयोग्य लडाकुया बिदाइ ज्याझ्वं पूवंगु धइगु नेपा:या शान्ति प्रकृयाय् छगू सकारात्मक पलाः जूगु खँ धयादीगु दु । वयेकलं राजनीतिक दलत दथुइ विश्वासया वातावरण निर्माण यायेत व आपसी सम्झदारी निर्माण यायेत थ्व पलाः अत्यन्त महत्वपूर्ण जूगु धयादिल ।
