निक्वःगु खुसिइ उपराष्ट्रपतिं मैथिली भाषं सपथ काइगु
हिन्दी भाषाय् सपथ कयाः कचवंलय् लानादीम्ह उपराष्ट्रपति परमानन्द झापाखें निक्वःगु खुसिइ मैथिली भाषं सपथ काइगु जूगु दु । मैथिली वय्कःया मांभाय् खः । उपराष्ट्रपति झापाखें थौं राष्ट्रपति ज्याकुथिइ पौ छ्वयाः मैथली भाषं सपथ कायेगु धयादीगु खः । राष्ट्रपति ज्याकुथिं कन्हय् न्हिनय् स्वतात्या इलय् सपथ ग्रहण ज्याभुवः ग्वसाःग्वयेत्यंगु दु ।
ज्याझ्वलय् प्रधानमन्त्री, प्रधानन्यायधीश, संविधानसभाया नायः, मन्त्रीत, संवैधानिक निकायया प्रमुख, राजनीतिक दलया प्रमुख व सरकारया सचिव बाहेक मेपिन्त ब्वनातःगु मदु ।
उपराष्ट्रपतियात निक्वःगु खुसिइ सपथ बिइत्यंगुलिं विदेशी कुटनीतिज्ञतय्त ज्याझ्वलय् दुमथ्याकेत्यंगु खँ राष्ट्रपति ज्याकू स्रोतं धाःगु दु । उपराष्ट्रपति झां १९ महिना न्ह्यः हिन्दी भाषं कयादीगु सपथयात सर्वोच्च अदालतं असंवैधानिक ठहर यायेवं अन्तरिम संविधानय् भिंकाः वय्कःयात निक्वःगु खुसिइ सपथ बिइत्यंगु खः । मांभाषं सपथ कायेदइगु कथं छवाः न्ह्यः अन्तरिम संविधान भिंकेज्या याःगु खः ।
