संयन्त्रया बैठकया एजेण्डा कोइरालाया स्वास्थ्य अवस्था
वर्तमान राजनीतिक समस्याया बारे मंकाः सहमति बारे सहमति यायेत शनिवाः च्वनीगु धाःगु उच्चस्तरी राजनीतिक संयन्त्रया बैठक नेपाली कांग्रेसया सभापति गिरिजाप्रसाद कोइराला अस्वस्थ्य जुयदीगुलिं अनौपचारिक रुपय् क्वचाःगु दु ।
शुक्रवा बहनी पिसावया संक्रमणया कारणं कोइराला बिरामी जुइवं संयन्त्रया बैठकय् ब्वति कायेत थ्यंकूपिं दुजःत वयेकया स्वास्थ्य अवस्था थुइकाः लिहांवंगु खः । बैठकय् ब्वति कायेत माओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल नापं आमन्त्रित दुजः प्रधानमन्त्री माधवकुमार नेपाल शनिवाः सुथय् च्यात इलय् हे कोइराला निवास महाराजगंज थ्यंकूगु खः ।
वंगु बिहीवाः नेतातय् व्यस्थताया कारणं बैठकय् च्वनेमफेवं शनिवाःया निंतिं लिछ्याःगु खः । हानं लिछ्याःगु बैठक आः कोइरालाया स्वस्थ्यय् सुधार जुइधुंकाः च्वनीगु खँ धाःगु दु ।
