सरकार परिवर्तन यायेगु अधिकार संयन्त्र याके दुला ?
उच्चस्तरीय राजनीतिक संयन्त्र गठन जुइवं सत्तारुढ दल व विपक्षी दल पाखें संयन्त्रया पक्षय् व विपक्षय् न्ववायेगु ज्या शुरु जूगु खः । आः वयाः संयन्त्र याके सरकार परिवर्तन यायेगु अधिकार दुगु व मदुगु बारे नेतातय्स सार्वजनीक ज्याझ्वलय् थःथःगु बिचाः प्वंकेगु ज्या अप्वयावंगु दु ।
वर्तमान सरकार परिवर्तनया हल्ला अप्वयाच्वंगु इलय् हे सत्तारुढ नेतातय्सं संयन्त्रं सरकार परिवर्तन यायेमफइगु धयाच्वंगु दुसाः विपक्षी माओवादीं संयन्त्रं सरकार परिवर्तन नं यायेफइगु तर्क न्ह्यब्वयाच्वंगु दु ।
थ्वहे दथुइ उपप्रधानमन्त्री नापं मधेशी जनअधिकार फोरम लोकतान्त्रिकया अध्यक्ष विजयकुमार गच्छदारं उच्चस्तरीय राजनीतिक संयन्त्रं षड्यन्त्र यायेत स्वयाच्वंगुलिं थुकीयात भंग तकं यायेमाःगु बिचाः प्वंकाच्वंगु दु । नापं वयेकलं संयन्त्रया कार्यविधि व आचारसंहिता कथं थुकीयात सरकार परिवर्तन यायेगु अधिकार मदुगु खँ धयादीगु दु ।
शुक्रवाः सुनसरीलय् जूगु छगू ज्याझ्वलय् पत्रकारत नाप खँल्हाबंला यानादिसें मन्त्री गच्छदारं संयन्त्रयात सरकार परिवर्तन यायेगु छुं नं अधिकार मदुगु कनादिल । वयेकलं उच्चस्तरीय राजनीतिक संयन्त्र राजनीतिक गतिरोध अन्त्य यायेगु निंतिं गठन जूगु धयादिसें थुकी सरकार परिवर्तन यायेगु खँ जुसाः व आचारसंहिता विपरित जुइगु धयादिल ।
उखे माओवादी उपाध्यक्ष मोहन वैद्य 'किरणं' उच्चस्तरीय राजनीतिक संयन्त्र नाप सरकार परिवर्तन यायेगु सामर्थ्य दुगु खँ धयादीगु दु । वयेकलं स्वंगू दलया शीर्ष नेतात दुथ्याःगु संयन्त्रनाप शान्ति प्रकृया व संविधान निर्माणयात निष्कर्षय् थ्यंकेगु नापं सरकार परिवर्तन यायेगु सामर्थ्य नं दुगु धयादिल ।
शुक्रवाः हे येँय् जूगु छगू ज्याझ्वलय् न्ववनादिसें नेता वैद्यं वर्तमान सरकारं राजनीतिक समस्या समाधान यायेमफुगु अवस्थाय् संयन्त्रं राजनीतिक गतिरोध ज्यंकेगु नापं सरकार परिवर्तन नं यायेफगु टिप्पणी यानादिल ।
