हत्यारायात सार्वजनिक मयाःगु धासें प्रहरी चौकीय् मिच्याकाबिल
स्थानीय विद्यालयलय् ब्वनाच्वंम्ह मिसाया हत्यारा सार्वजनिक मयाःगु द्वपनय् स्थानी बासिन्दातय्सं हटिया स्थित अस्थायी प्रहरी चौकीइ मि च्याका ब्यूगु दु ।
स्वन्हु न्ह्यः स्थानीय मिसाया सहस्यमय ढंगं हत्या जुइवं प्रहरीं निम्ह ल्याम्हयात ज्वंगु तर सार्वजनिक मयाःगु धासें स्थानीय बासिन्दातय्सं चौकी तोडफोड यायेगु नापं मि नं च्याकाब्यूगु खः । चौकीलय् मि च्याना: संचार सेट, मेच, टेवल नापं भवन नं ध्वस्त जूगु दु ।
स्थानीय बासिन्दातय्सं प्रहरी चौकीलय् तोडफोड यायेवं प्रहरीं हावइ फायर नं याःगु खः । हवाइ फायरं नं घटना नियन्त्रणय् मवयेवं प्रहरी व प्रदर्शनकारीत दथुइ ल्वापू नं जूगु खः । ल्वापू लनाः प्यम्ह प्रहरी व न्याम्ह प्रदर्शनकारी घाःपाः जूगु दु ।
वंगु मंगलवाः बहनी हटिया गाविस-३या झिंच्यादँया सुशिल सहनीयात थः हे बोइफेण्डं स्याःगु द्वपं सहनीया छेँजःलं ब्यूगु दु । हटिया गलकोट उच्च माध्यमिक विद्यालयलय् झिंनिगू तगिमय् ब्वनीम्ह सहानीया निलाया गर्भ दुगु खँ पोष्टमार्टमं क्यंगु दु ।
घटनाय् संलग्न जूगु आशंकाय् प्रहरीं डिक्सा व सागर केसीयात ज्वंगु दु । ज्वना यंकूपिं निम्हेसितं इलाका प्रहरी ज्याकू हरिचौरय् तयाः अनुसन्धान यानाच्वंगु खँ प्रहरीं धाःगु दु । हत्या लिपाः हटिया बजा: व नापसंया दक्वं विद्यालय बन्द जुयाच्वंगु दुसाः प्रदर्शनकारीतय्सं हत्यारायात सार्वजनिक यायेमाःगु व कडा कारवाही यायेमाःगु माग यासें प्रदर्शन यानाच्वंगु दु ।
