'लडाकु समायोजन न्हू संविधान न्ह्यः हे जुइ'
प्रधानमन्त्री माधवकुमार नेपालं माओवादीया सेना समायोजन न्हू संविधान निर्माण याये न्ह्यः हे यायेमाःगु खँ धयादीगु दु । माओवादीं सेना समायोजन व संविधान निर्माण नापनापं यायेमाःगु खँ धयाच्वंगु इलय् प्रधानमन्त्रीया थंज्याःगु धापू पिहांवःगु खः ।
प्रसे चौतारी नेपालया खुक्वःगु राष्ट्रिय अधिवेशनया शुक्रवाः बुटवलय् उल्लेज्या यानादिसें प्रधानमन्त्री नेपालं संविधान जारी याये स्वयां न्ह्यः हे माओवादी लडाकु समायोजन यायेगु निर्णय जूगुलिं वहे कथं ज्या यायेत गृहकार्य जुयाच्वंगु धयादिल । वयेकलं सेना समायोजन यायेगु ल्या धाःसा निर्धारण याये ल्यंदनीगु तर माओवादीं धाःगु ल्यख्य् समायोजन यायेमफइगु धयादिल ।
वयेकलं सरकार परिवर्तन बारे माओवादीं न्ह्याकूगु आन्दोलन गलत जूगु धयादिसें बहुमतया आधारय् नियमसंगत तरिकां गठन जूगु सरकार चीकेत नं वहे विधि नालेमाःगु बिचा: प्वंकादिल । वयेकलं माओवादीं थःगु सरकार गठन यायेगु खसाः बहुमतीय आधारय् वयेमाःगु नत्र आन्दोलनं सरकार क्वमदली दाबी यानादिल ।
