माओवादीं ल्वाभः त्वते धुंकाः जक संविधान जारी : पौडेल
नेपाली कांग्रेस संसदीय दलया नेता रामचन्द्र पौडेलं माओवादीं ल्वाभः मत्वःतु तलले संविधान निर्माण मजुइगु खँ धयादीगु दु ।
बुधवाः नेपाल तरुण दल तनहुं ग्वसाःग्वःगु नेतॄत्व विकास अभिमुखिकरण ज्याझ्वःया उल्लेज्या यानादिसें नेता पौडेलं माओवादी नाप ल्वाभः दतल्ले लोकतान्त्रिक संविधान निर्माण जुइमफइगु धयादिसें माओवादीं ल्वाभः त्वते धुंकाः जक संविधान जारी यायेमाःगु बिचाः प्वंकादिल ।
वयेकलं माओवादीयात अझ नं ल्वाभ प्रति घमण्ड दुगु व माओवादी अध्यक्षं संविधानसभा न्ह्यने निशस्त्रीकरण जुइमखु धाःगु धापू पाखें माओवादी याके ल्वाभः मोह अभः ल्यंदनीगु प्रमाणित जूगु धयादिल । नेता पौडेलं माओवादीं जनतायात दुखः बीगु ज्या जक यानाच्वंगु धयादिसें उपिं जनताया पासा जुइमफइगु धयादिल ।
थःगु गृह जिल्ला तनहुँलय् जूगु ज्याझ्वलय् वयेकलं जिल्ला दुनेया कांग्रेस कार्यकर्तायात दथुइ भ्रम ब्वलंकाः कांग्रेसयात कमजारे यायेत स्वयाच्वंगु द्वपं बियादिसें कार्यकर्तातय्त गुट उपगुटया ल्यूने मवंसें पार्टीयात बल्लाकेत इनाप यानादिल ।
