त्रिशुलीइ बस कुतुवना न्हय्म्ह सित

येँ नं सुनसरीया बराह क्षेत्र वनाच्वंगु छग: यात्रुबाहक बस बिहीवा: बहनी त्रिशुलीलय् कुतुवना: न्हय्म्ह यात्रुत सीगु दुसा: झिंन्याम्ह घा:पा: जूगु दु ।

तिर्थयात्री ज्वनां वंगु बा.२.ख ६२७१ नम्बरया बस मुग्लिङ-नारायणगढ सतक खण्डया जलबिरेलय् दुर्घटना जूगु ख: । बस सतक पाखें १ सय मिटर क्वये त्रिशुली खुसीइ कुतुवना: घटनास्थलय् खुम्ह व छम्ह अस्पताल यंकेगु झ्वलय् मदुगु ख: ।

जिल्ला प्रहरी कार्यालय चितवनं दुर्घटनाय् किपु नगरपालिया लक्ष्मी खनाल, रामबाबु बास्कोटा, कृष्ण बास्कोटा, शुभेच्छा बास्कोटा, रेखा खनाल, ख्वप: नगरपालिकाया बिष्णु प्रजापति व येँ मातातिर्थ गाविस-२या रामचन्द्र रिजाल सीगु खँ धा:गु दु । घा:पा: जूपिं दक्व खतरा मुत्त जूगु खँ नं प्रहरीं धा:गु दु ।