विषयगत समितिया सहलह क्वचाल
संविधानसभा अर्न्तगत थीथी झिंछगू विषयगत समितिया प्रारम्भिक मस्यौदाया सहलह बिहीवाः क्वचाःगु दु । संविधानसभाया कार्यतालिका कथं विषयगत समितिया मस्यौदा बारे सहलह यायेत माघ २१ गते तकया ई क्वछीनातः कथं बिहीवाः लिप्पांगु न्हि सहलह जूगु दु । सहलह सिधेवं संविधानसभाया अध्यक्ष सुवासचन्द्र नेम्वाङं संविधान निर्माण यायेगु छगू महत्वपूर्ण ज्या सिधःगु टिप्पणी यनादिल ।
सहलहया लिप्पांगु न्हि राज्य पुनर्संरचना व राज्य शक्तिया बाँडफाँड समितिया प्रारम्भिक मस्यौदाय् सभासद्तय्सं थःथःगु बिचाः प्वंकूगु खः । बैठकय् एनेकपा (माओवादी)या सभासद् रामबहादुर थापा 'बादलं' यथास्थितिवादी शक्तितय्गु कारणं नेपाःया संघीय व्यवस्था तनेफुगु धयादिल । वयेकलं समितिं आत्मनिर्णयया अधिकार व अग्राधिकार सहित झिंप्यंगू प्रदेशया व्यवस्था या:गु पाय्छि जूगु धयादिल ।
कांग्रेसया सभासद् लक्ष्मण घिमिरें समितिं जातीय प्रदेश दयेकूगु प्रति असुन्तुष्टि प्वंकादिसें छु जातिया नांमं प्रदेश निर्माण याःगु खः अन वहे जाती अल्मतय् लायेधुंकूगु धयादिल । वयेकलं नेपाः थंज्याःगु चीधंगु देशं झिंप्यंगू प्रदेश धाने यायेमफइगु टिप्पणी यानादिल ।
अथेहे एमालेया सभासद् विष्णु पौडेलं समितिया प्रतिवेदनं पहिचानयात जक अप्व थाय् बीयाः प्रदेश निर्माण याःगु तर सामर्थ्ययात बारे बिचाः मयागु द्वपं बियादिल । तराई-मधेश लोकतान्त्रिक पार्टीया हृदेश त्रिपाठीं प्रतिवेदनं मधेशीतय् अधिकार हनन् याःगु धयादिल ।
बैठकय् न्ववापिं अधिकाशं माओवादी सभासद्तय्सं प्रतिवेदन समारात्मक जूगु व थुकीं संघीय लोकतान्त्रिक गणतन्त्रया विकासय् ग्वाहालि याइगु बिचाः प्वंकूगु खःसा कांग्रेस, एमाले लगायतया सभासद्तय्सं जातीय आधारय् प्रदेश विभाजन यायेमज्यूगु धासें प्रतिवेदनया विरोध याःगु खः । अथेहे मधेशी सभासद्तय्सं दक्वं मधेशयात छगू प्रदेश दयेकेमाःगु माग याःगु खः ।
बिहीवाः विषयगत समितिया प्रतिवेदनय् लिप्पांगु सहलह लिपाः संविधानसभाया बैठक अनिश्चितकालया निंतिं स्थगित याःगु दु ।
