'देशभक्त व जनतान्त्रिकतय् मोर्चा'
एकीकृत नेकपा (माओवादीं) शान्ति प्रकृया व संविधान निर्माण व थःपिनिगु आन्दोलनया निंतिं देशभक्त व जनतान्त्रिक शक्तित दथुइया मोर्चा गठन यायेगु खँ धाःगु दु ।
स्थायी समिति बैठकया निर्णय बारे जानकारी बीत बिहीवाः पार्टी मू ज्याकू पेरिसडाँडाय् ग्वसाःग्वःगु पत्रकार सम्मेलनय् माओवादी अध्यक्ष पुष्पकमल दाहाल 'प्रचण्डं' शान्ति व संविधान निर्माण अवरुद्ध यायेगु षड्यन्त्र जुयाच्वंगुलिं मोर्चाया प्रस्ताव यानाःगु धयादिल । वयेकलं मोर्चाया निंतिं माओवादीं आः ठोस पहल यायेगु नं धयादिल । नापं वयेकलं शान्ति प्रकृया व न्हूगु संविधान जारी यायेत अवरोद्ध ब्वलंकेत स्वःसाः जनता नाप विद्रोहया अधिकार दुगु धयादिल ।
संविधानसभा पाखें जनताया संघीय गणतन्त्रात्मक न्हूगु संविधान जारी यायेगु आःया दकलय् महत्वपूर्ण ज्या जूगु धयादिसें प्रचण्डं सेना समायोजन व संविधान निर्माण नापनापं यंकेमाःगु धयादिल ।
वयेकलं माओवादीं राष्ट्रिय स्वाधिनता, नागरिक सर्वोच्चता, शान्ति प्रकृया, न्हूगु संविधान व राष्ट्रिय मंकाः सरकारया कार्यनीतिक श्रृंखलाय् पार्टी दुने मतभेद मदुगु व उकया निरन्तरता हे आःया आवश्यकता जूगु धयादिल ।
अथेहे पत्रकार सम्मेलनय् वयेकलं फागुन १ निसें चैत २४ गते तक लाइगु थीथी अवसरयात आन्दोलनया हे ब्व कथं न्यायेकीगु धयादिल ।
