फिल्मया पर्दाय् राजनीतिया खँ

फिल्मय् राजनीतिया प्रभाव धइगु सामान्य खँ खः । भारतय् मणिरत्नम् नांयाम्ह छम्ह निर्देशकया तःगू हे फिल्मय् राजनीतिया छाप याउँक हे खनेदु । रोजा, बम्बइ, दिल से, युवा मणिरत्नमया छुं्र छुं अज्याःगु हे फिल्म खः । अंग्रेज विरुद्ध आन्दोलनया बाखं दुगु फिल्म नं तःगू हे दु । मनोज कुमारया 'शहिद' व 'क्रान्ति' निसें अनिल कपूर, मनिषा कोइराला, डैनी दुगु '१९४२-ए लभस्टोरी' अले अजय देवगनया 'शहिद भगत सिंह' जक मखुसे राजेश खन्ना, मुमताजया 'पे्रम कहानी' थेंज्याःगु फिल्मय् तकं अंग्रेज विरुद्ध आन्दोलनया खँ न्ह्यब्वयातःगु दु ।

नेपालय् 'बलिदान' दुने ०४६ सालया आन्दोलनया खँ दु । 'वीर गणेशमान' दुने १९९४ वि.सं. य् जूगु राणा विरुद्धया आन्दोलननिसे ०४६ सालय् पञ्चायत विरुद्ध जूगु आन्दोलनया न्ह्यलुवा क्रान्तिकारी नेता गणेशमान सिंहया जीवनी न्ह्यब्वयातःगु दु । माओवादीया विचारयात आगो, जनयुद्ध, लाल सलाम, शहिद, नयाँ नेपाल, आवाज थंेज्याःगु फिल्मय् न्ह्यब्वयातःगु दु । खय्त ला फिल्मय् भ्रष्ट नेतायात मभिं पात्र दयेकाः क्यनेगु चलन कलिउड व बलिउडय् यक्व हे खनेदु । तर बाखं दुने हे राजनीतिया खँ दुबिनाच्वंगु फिल्म धाःसा म्हो जक दु । भारतय् गुलजारं तःगू हे फिल्मय् राजनीतिया थीथी पक्ष्ँयात फिल्मय् न्ह्यब्वयाक्यन । सुचित्रा सेन व संजीव कुमारया मू भूमिका दुगु 'आंधी' ला भारतया प्रधानमंत्री स्व. इन्दिरा गांधीया जीवनलिसे ज्वःलाःगु बाखं धकाः तकं बय्बय् जुल । छम्ह मिसाम्ह राजनीतिज्ञया दुग्यंगु चित्रण दुगु 'आंधी' यात आतक नं छगू ज्वःमदुगु फिल्मया रुपय् कयातःगु दनि । थ्व हे फिल्मं प्रभावित जुयाः निर्देशक मधुर भन्डारकरं 'सत्ता' नांयागु छगू फिल्म नं दयेकल । थुकी रविना टंडनं मिसाम्ह नेता जुयाः म्हितूगु खः, अले थीथी सिरपाः नं त्याकल । तर 'आंधी' या छाप हुइमफु । गुलजारं 'माचिस' फिल्मय् आतंकवादया राजनीतियात बाखं दयेकलसा सन् १९७१ पाखे युवातय्गु राजनीतिया बाखं ज्वनाः 'मेरे अपने' दयेकल । राजनीतिया दुग्ययेक छाप क्यनेगुली न्ह्यलुवा गुलजारया दकलय् लिपायागु फिल्म 'हु तु तु' धाःसा उलि ग्यने मफुत ।

छम्ह आखः मसःम्ह हज्जाम लिपा भ्रष्ट नेता जुइगु 'आजका एम.एल.ए. राम अवतार'य् राजेश खन्ना मू पात्र जुयाः म्हितूगु खः । हास्यव्यङ्गया रुपय् दयेकूगु थ्व फिल्म नं उलि ताःलाये मफुत । थ्व हे इलय् जीतेन्द्रया 'देश' व अभिताभ बच्चनया र्'इन्कलाव' नं उलि ताःलाये मफुगु राजनीतिया बाखं दुगु फिल्म खः । बलिउडय् इलय्ब्यलय् कम्यूनिष्ट राजनीतिया बाखं फिल्मया पर्दाय् तकं थ्यना च्वं । अभिताभ बच्चन हे दुगु 'मै आजाद हुँ' नं अज्याःगु हे फिल्म खः । थथे तप्यंक हे विचार न्ह्यःब्वइगु बाहेक नमकहराम, बहारों के सपने, नयाँ दौर, मजदुर थेंज्याःगु कमर्र्शियल फिल्मय् नं सीमदयेक वाम विचार न्ह्यब्वयातःगु दु । थज्याःगु फिल्म बाहेक राजनीतिया तप्यंक हे बाखं दयेकीगु चलन पुलांगु मखु । न्हापा'दामुल' थेंज्याःगु राजनैतिक विचारधाराया उत्कुष्ट नमुना जूगु फिल्म दयेकूम्ह निर्देशक प्रकाश झां थौं 'राजनीति' नां छुनाः फिल्म दयेकाच्वंगु दु । थुकी केटरीना कैफं मू भूमिका म्हिताच्वंगु दु । थ्व सोनिया गान्धीया जीवनीलिसे ज्वःलाःगु फिल्म धकाः बय्बय् यानातःगु दु । थगुने तसकं चर्चित जूगु 'ए वेडनस्डे' नं छगू राजनीतिया बाखं खः । न्हापा निर्देशक रामगोपाल वमार्ं कलेज राजनीतियात 'शिवा' फिल्मय् न्ह्यब्वःगु खःसा थुगुसी निर्देशक अनुराग कश्यपं 'गुलाल' दुने अज्याःगु हे लकस न्ह्यःब्वयेगु कुतः याःगु खः । राजनीतियात पर्दाय् न्ह्यब्वयातःगु फिल्म मालेगु खःसा भारतय् यक्व हे लुयावइ । अले अज्याःगु फिल्मं बौद्धिक वर्गयात फिल्मया हलय् तक याउँक हे सालाकाःगु नं खनेदइ । तर नेपालय् अथे जुइ मफुनि । राजनीतियात बाखनय् दुग्यंक ल्ह्वने मफुत कि व नाराबाजी जक जुइ । माओवादी विचार नं फिल्मय् नाराबाजी जक जुलसा 'लिधंसा' नांयागु नेवाः फिल्म नं नाराबाजी जक हे जूगु फिल्म खः ।

बिजयरत्न असंबरे

More Stories Like this

हलिउडया ल्याटिन सुन्दरीत
सिक्वेल फिल्मया लहर