बांलाःगु सुझावयात सुभाय्

सम्पादकजु,

ने.सं. ११२९ चिल्लाथ्व ८ अष्टमी कुन्हु पिदंगु चक्रबहादुर धाख्वाजुयागु पौ ब्वने धुंकाः जितः नं छुं खँ धाये मास्ति वःगुलिं थ्व पौ च्वयाच्वना । छिं ज्ञानमाला भजन स्वयम्भुयात बियादीगु सल्लाह व सुझाव तसकं पाय्छि जू । थःपिनिगु मूल्यांकन थःपिंसं तुं यायेगु पलेसा छिकपिं थें सःसिउपिपाखें यानादीगु साप बांलाः । छिकिपंथाय् थति त्वाः यलय् भजन जूबलय् जि नं भजन याः वयागु खः । वकुन्हु दकलय् लिपा तमल थानादीम्ह भाजु लक्ष्मण उदास तुलाधर खः । वय्कलं स्वयम्भु भजन सतलय् नं तमल थायेगु यानाच्वंगु दु । वय्कः न्ह्याथाय् भजन याःवने माःसां थःगु हे तमल ज्वना झाइ । वय्कःयागु थ्व बानी स्वये मयःपिं नं दु । आः छिं वय्कलं थानादीगु तमलया सुर मिले जू धकाः तारीफ यानादीगुलिं पदाधिकारिपंसं नं थ्व खँय् ध्यान तयादी हे जुइ । अले ज्ञानमाला भजन स्वयम्भुयात गुगु मान सत्कार यानादिल जिपिं साप लय्ताः । भजनया इलय् हे दथुइ दथुइ जिमिगु कथु गनी धकाः स्क्वास त्वंकाः हल्स इनादिल अले भजन क्वचायेकाः साक्क भ्वय् नकादिल । अले जिमिसं हालागु भजन ध्यान बियाः न्यनाः जिमित हौसला बियादिल । थुकिया लागिं भजन ब्वनामी मछेन्द्र मृदङ्ग भजन मण्डलयात व सकल ज्यासनामि पचु:यात जिगु नं दनु गुलंनिसें सुभाय् देछानाच्वना ।

- कृष्णमान डंगोल,
मखंगल्लि तुनछेबहाः येँ ।

More Stories Like this

केन्द्रया अनुमति कयाः आर्थिक ज्या जुइ मखु
प्वंकेमखंगु श्रद्धांजिल
सुवर्ण शाक्य कि सुवर्णकेशरी ?
लाःलाःथें भाःथकाये मजिल
बजटें छु राहत बी थें ?